Emakunderen ikerketa baten arabera, bakarrik bizitzea "ikasketa bat da, aukera bat" adineko emakume askorentzat

Bakarrik bizi diren adineko emakume askok egoera hori hazkunde pertsonalerako eta gizarteari ekarpena egiteko aukera gisa ikusten dute, Emakundek egindako ikerketa baten arabera. Halaber, emakumeen bakardadearen estereotipoari aurre eginez, azterlanak ondorioztatu du ez dutela zertan bakarrik sentitu. 

Miren Elgarresta Emakunderen zuzendariak 'Euskal Autonomia Erkidegoan bakarrik bizi diren adineko emakumeak: emandako baimen soziala?' txostena aurkeztu du gaur goizean Gasteizen, Iratxe Herrero eta Carlos Diaz de Argandoña ikertzaileekin eta Luis Eduardo Royero Gasteizko Udaleko Gizarte Politiketako Saileko zinegotziarekin batera. 

Elgarrestak adierazi duenez, "adineko emakume askorentzat, bakarrik bizitzea ikasketa bat da, aukera bat, hazkunde pertsonaleko etapa bat; tristura eta bakardade uneak barne hartzen dituen arren —bizitzako beste edozein etapatan bezala—, gehienbat positibotzat jotzen da, bai haien bizimoduan aldaketa izan dutenen artean, bai askatasunez aukeratu dutenen artean ere".

Emakume baino gizon gehiago

EAEn bakarrik bizi diren pertsona guztietatik, % 32,5 dira 65 urte eta gehiagoko emakumeak, eta gehienak (% 75,4) alargunak dira. 

Generoak eragina du bakarrik bizi diren adinekoen pertzepzio sozialean. Ildo horretan, azterlanaren arabera, bakarrik bizi diren adineko emakumeen irudia negatiboa generoarekin eta adinkeriarekin lotuta dago, eta egoera hori tristuraz bizi dutela ondorioztatzen da, estereotipo negatibo bat indartuz.

Hausnarketa gisa, lanak ohartarazten du presio sozial handia dagoela bakarrik bizi diren emakumeen gainean gizonezkoen gainean baino. Beste era batera esanda, emakumeek nolabait gizarte-baimena behar dute bere bizimodua aukeratzeko eta horrek bere bizi-kalitatea baldintzatzen du eta haren zaurgarritasuna areagotu dezake. 

Ikertzaile taldeak bi erronka aipatu ditu, politika publikoek beren gain hartu beharrekoak: batetik, gazteak zirenean bizimodua bakarrik egitearen aldeko hautua egin zuten emakume askoren eginkizun aitzindaria aitortzea, eta, bestetik, adineko emakumeek gaur egun bakarrik bizitzeko duten eskubidea ahalbidetzea.