Oyarzabal: "Sevilla eta Kopa hau bihotzean eramango ditugu beti; baina zuen zoriontasuna ikusteak ez dauka preziorik, eta horrekin geratzen gara”

Realak lortutako tituluaren ospakizun ofizialek poza eta emozioa ekarri dituzte astelehen eguzkitsu honetan Donostiara. Milaka lagunek, haur zein heldu, mukuru bete dituzte hiriburuko kaleak, Realaren kamiseta eta bufandak jantzita, Anoeta estadiotik udaletxerako bide osoan.

18:00etan ekin dio ibilbideari txuri-urdinen autobusak estadiotik. “Txapeldunak” idatzita zuen estali gabeko ibilgailuan, poliki-poliki, jokalari guztiek agur egin diete kale ertzean zain zituzten zaleei, horien animo eta esker garrasi eta txalo artean. Mikel Oyarzabal, Aritz Elustondo eta Igor Zubeldia kapitainek Sevillan lortutako Errege Kopa airean ibili dute, zaleei erakutsiz eta eskainiz.

Amara auzora sartu eta hiriko erdigunea zeharkatu dute, 19:15 inguruan Alderdi Ederrera iritsi arte. Bertan, haur danborrada batek Realaren ereserkia joz hartu ditu. Milaka lagun zeuden bertan zain, arratsaldeko lehen ordutik.

Udaletxe aurreko terrazan, jokalariek, teknikariek, zuzendariek eta langile guztiek bi dantzariren agurra jaso dute. Euren ondoan, Jon Insausti Donostiako alkatea, Eider Mendoza Gipuzkoako Ahaldun Nagusia eta Imanol Pradales lehendakaria. Hirurak Sevillan izan ziren, finalaz gozatzen.

Udaletxe barrura sartu dira ondoren, omenaldi ofiziala jasotzera, eta handik udaletxeko balkoira irten dira jokalariak zaleen errekonozimendua jasotzera. 

Oyarzabal irten da lehenik, eta kopa erakutsi ondoren, taldekideak batu zaizkio. “Arratsalde on, Donostia. Arratsalde on, Gipuzkoa. Guretzat plazera da zuen zoriontasuna ikustea, eta berriz esango dugu Kopako txapeldunak garela. Lehen egunetik zuen bultzada eta berotasuna sentitu ditugu", esan du. "Hemen gaude duela bost urte irabazi genuen Kopa ere ospatzeko, hemen daudenengatik eta ez daudenengatik”, nabarmendu du Oyarzabalek, zaleek "Aitor Zabaleta" oihukatzen zuten bitartean. 

"Sevilla bihotzean eramango dugu beti, Kopa hau ere bai, baina guretzat hau dena ikusteak, zuen zoriontasuna ikusteak, ez dauka preziorik eta horrekin geratzen gara” amaitu du euskara hutsean emandako mezua.

Ondoren, Matarazzo entrenatzaileak hartu du mikrofonoa, eta hark ere euskaraz egin du bere hitzaldi osoa: “Arratsalde on! Txuri-urdinak gara, txapeldunak gara! Sentitzen dut hau hasiera besterik ez dela!" esan du. 

Eskerrak eman dizkie zaleen erakutsitako maitasunagatik, "lehen egunetik erakutsi didazue zer den Reala. Eskerrik asko! Guazen Reala!", esanez amaitu du.

Bere ondotik, Unai Marrero atezainak, final honetako heroiak, hitz egin die bertaratutakoei. Bertan izatea "plazera" dela esan du eta eskerrak eman dizkie bai langileei baita zaleei ere.

Ondoren, Aritz Elustondok hartu du lekukoa speaker lanetan, eta, tartean, duela bost urte irabazitako kopari keinu bat egin dio Imanol Alguazilek orduan biral egindako esaldia imitatuz.

Oskarssonek ere ereserki bihurtu den hari eskainitako abestia kantatu du balkoian.

Udaletxe aurreko terrazara atera dira ondoren, kantu eta dantza artean, eta Elustondok hartu du mikrofonoa, eta jokalarien aurkezpena egi du, banan-banan, txantxetan. Gaztelaniaz egin du horretarako.

Bere aurkezpenaren txanda iritsi denean, Mikel Oyarzabal kapitainak hartu du mikrofonoa.

Une batean etenaldia egin behar izan dute, oholtza ondoan ziren bi lagunek osasun arreta jaso zezaten.

Donostian bertan zein norbere etxean jarraituko du orain jaiak, baina realzale guztien bihotzean betiko geratuko da gaurko eguna.