Epaileak bertan behera utzi du, behin-behinean, Bernedoko udalekua antolatzeko debekua

Epaile batek, behin-behinean eta kautelazko neurri gisa, bertan behera utzi du Sarrea Euskal Udalekua elkarteak aisialdi jarduerak antolatzeko zuen debekua. Horren berri ohar bidez eman dute Euskal Udalekuen antolatzaileek, eta nabarmendu dute, “gaur-gaurkoz", Sarreak legez antola ditzakeela "aisialdi jarduerak" eta "udalekuak egin”.

Hala ere, adierazi dutenez, aurten ez da udaleku jarduerarik izango Bernedon (Araba); izan ere, debekua indarrean sartu zenean prestatutako bestelako alternatibekin jarraitzea erabaki dute antolatzaileek.

Sarrea Euskal Udalekuak elkarteari ezarritako zigor administratiboa joan den ekainaren 4an bihurtu zen irmo. Orduan, Ana del Val Arabako Foru Aldundiko Kultura diputatuak jakinarazi zuen aldundiak debekatu egin ziola Sarreari Bernedoko udalekuak antolatzea, baita Dorrekoa kultur elkarteari ere —Euskal Udalekuen sareko kidea da—, "lege iruzur saiakera" egitea egotzita.

Sarreak 9.000 euroko isuna eta hiru urterako inhabilitazioa jaso ditu, besteak beste. Aldundiaren arabera, azken bi urteetan ez zuen udaleku jardueren nahitaezko jakinarazpenik aurkeztu.

Autoa

Elkarteak ekainaren 4ko ebazpenaren aurkako errekurtsoa aurkeztu zuen. Ebazpen horren bidez zehapenak ezarri zitzaizkion, eta, premiazko kautelazko neurri gisa, inhabilitazioa berehala etetea eskatu zuen.

Epaitegiak premia bereziko inguruabarrak daudela iritzi dio, eta kautelaz etetea erabaki du Aldundiak ezarritako hiru urteko desgaitze-zehapena betearaztea; hau da, haur eta gazteen aisialdiko jarduerak antolatu eta egiteko ezarritako debekua eten du, "prozedurari amaiera eman behar dion ebazpena irmo bihurtu arte".

Ebazpenaren aurrean ez dagp errekurtsorik aurkezterik, eta, halaber, kautelazko neurriaren eskaera izapidetzen jarraitzea erabaki du, Administrazioarekiko Auzien Jurisdikzioa arautzen duen Legearen 135.1 artikuluaren arabera. Horretarako, hiru eguneko entzunaldi-epea eman zaio Administrazioari, hartutako neurriari eutsi, hura indargabetu edo aldatzeari buruz erabakitzeko.

Autoan, epaitegiak adierazten duenez, eskatutako kautelazko neurriari buruzko erabakirik hartu ezean, elkarteak "ezingo luke 2026ko udako programazioa gauzatu; programazio horren zati handi bat, seguruenik, dagoeneko boluntarioekin, materialaren eta lokalen alokairuekin, hainbat kontraturekin eta interesa duten familien izen-emate eta matrikulekin lotuta baitago".

Ildo horretan, adierazten du etorkizuneko epaia "nahitaez 2026ko uda igaro ondoren emango dela" eta ohiko kautelazko neurri bat ere ez litzatekeeña "erabilgarria" izango; izan ere, ezingo litzateke "uztailaren erdialdera edo amaierara arte ebatzi". "Horrek programaren erdia galtzea ekarriko luke, eta, ondorioz, beste erdia ere bideraezin bihurtzea".

Autoak jasotzen duenez, "balizko zehapen ekonomikoaren baliogabetzea ekonomikoki konpon liteke; ez, ordea, hiru urtez aisialdiko jarduerak antolatu eta egiteko ezarritako desgaitze-zehapena. Izan ere, denbora horrek proiektuari jarraipena emateko ezinbestean galdutako aukeren multzoa dakar".

Azkenik, epaitegiaren ustez, "ez Administrazioari ez hirugarrenei ez zaie kalterik eragiten kautelazko etenduraren ondorioz", eta interes publikoa bermatuta dago; izan ere, "neurriak ez du eragotziko Administrazioak bere ikuskatze-ahalmena baliatzea eta elkarteari aseguruak, jarduera-protokoloak eta jarduketa-planak eskatzea, udarako programatutako jardueraren normaltasuna eta legezkotasuna egiaztatzeko".

Ikerketaren arrazoiak

Zehapen-prozedura adingabeen sexu-askatasunaren aurkako egintzei buruz jasotako 21 salaketaren ondoren abiatutako ikerketa judizialarekin batera jarri zen abian.

Salaketak honako jokabide hauekin lotuta daude: exhibizionismoa, umiliazioak, hertsapenak, sexu-probokazioa, osotasun moralaren aurkako jokabideak eta sexu-erasoa. Gertakariak udaleku batzuetan izan omen ziren, eta parte-hartzaile batzuek adierazi dutenez, neska-mutilak elkarrekin dutxatzera behartzen zituzten, eta monitoreak ere bertan biluzik garbitzen ziren.