Osakidetzak eta farmaziek 2 motako diabetesa duten 65 urtetik gorako paziente polimedikatuen medikazioa zainduko dute

Osakidetzak eta Euskadiko Farmazia Elkargoek lankidetza-hitzarmena sinatu dute 2. motako diabetesa duten, 65 urte baino gehiago dituzten eta modu jarraituan 8 botika edo gehiago hartzen dituzten pertsonen tratamendua kontrolatzeko. Hitzarmenak 4 urteko indarraldia izango du, eta 100.000 euroko finantzaketa urtero, jarraipen farmakoterapeutiko egituratua aktibatzeko eta gaixoen bizi-kalitatea eta atxikimendu terapeutikoa hobetzeko.

2 motako diabetesak gizonen % 4,9ri eta emakumeen % 3,6ri eragiten die dagoeneko Euskal Autonomia Erkidegoan. Patologia baskular eta zirkulaziokoekin duen lotura estuak, prebentzio-tratamenduen gorakadarekin batera, gaixo asko botika ugari hartzera bultzatzen ditu (hori da, hain zuzen, polimedikazioa). 

Ondorioz, jarraipen farmakoterapeutiko pertsonalizatua egingo dute tratamenduak egokitzeko, atxikimendu terapeutikoa handitzeko, botikekin lotutako arazoak detektatzeko eta osasun-emaitza hobeak lortzen laguntzeko. 

Gaur sinatutako hitzarmenak ezartzen du farmazialariek medikazioaren berrikuspen integrala egingo dutela, eta farmazien eta Osakidetzako Lehen Arretako profesionalen arteko koordinazioa sustatuko duela. Horrela, medikazioarekin lotutako gorabeherak jakinaraztea, ospitaleratzeen zein kontsulta espezializatuen ondorengo tratamenduak kontziliatzea eta parte-hartzaileen etengabeko jarraipena egitea bultzatuko du.

Lore Bilbao Osakidetzaren zuzendari nagusiak adierazi duenez, "pazienteen bila atera behar gara eta sare komunitario koordinatu, seguru eta eraginkorra ehundu. Hurbil egoteak aukera emango digu atxikidura ebaluatzeko, ospitaleko alten ondoren medikazioa bateratzeko, eta gure pazienteen ongizatea arriskuan jar dezaketen edozein segurtasun intzidentzia goiz detektatzeko".