Haurrak protagonista Gasteizko jaietan, Edurne eta Zeledon Txikiren jaitsierarekin

Gasteizko jaietan Haurren Eguna ospatuko dute gaur. Familien artean interes gehien biltzen duen egunetako bat da, eta Edurne eta Zeledon Txiki izango ditu protagonista. Aurten, Haizea Lauzurica Bereziak kuadrillako 12 urteko neska eta Ekain Gonzalez Los Desiguales kuadrillako 12 urteko blusa izango dira protagonistak.

Jardunaldia 10:45ean hasiko da, Gasteizko haurrek Andre Maria Zuriari egingo dioten lore-eskaintzarekin. Horma-hobiaren aurrean eta San Migel elizako kaperan egingo dute.

12:00etan, Edurne eta Zeledon Txiki jaitsiko dira San Migel dorretik Andre Maria Zuriaren plazara, eta ekitaldia zuzenean jarraitu ahal izango da orain.eus-en.

Eguerdi partean, Acordes Navarros taldearen jotak izango dira Prado parkean, eta Herri Kirolen Txapelketa Foruen plazan. Ordubete geroago, Erraldoi, Buruhandi, Zaldi eta Txoten konpartsak kaleak zeharkatuko ditu Andre Maria Zuriaren plazatik. Aihotz plazan, berriz, bertso-saioa izango da Eli Zaldua, Peru Abarrategi, Maddi Ane Txoperena eta Beñat Gaztelumendirekin.

Arratsaldean, 17:00etan, blusen eta nesken kuadrillek ohiko kalejira egingo dute. Edurnek eta Zeledon Txikik ere parte hartuko dute bertan, Foru kaletik Posta kaleraino.

Programazioak musika eta kultur proposamenekin jarraituko du arratsalde eta gau osoan zehar. Falerina Lorategietan, Mamuak eta Edgar Allan Pop taldeen kontzertuak izango dira, eta Moonshine Wagon Santa Maria plazan arituko da.

Gauean, Larrain Dantza eta Txulalai, ohiko zezensuzkoa, Me vale madre, PI L.T., Neomak, Sedientos de Cumbia eta Alaska on Tour orkestraren kontzertuak eta Gasteizko Piroteknia Ikuskizunen Nazioarteko XXII. Erakustaldia izango dira Mendizabalan, Pibierzo Piroteknia etxearen eskutik.