Barakaldon ostegunean tirokatu zuten gizona hil egin da

Barakaldon ostegun iluntzean izandako tiroketan zauritutako 48 urteko gizonezkoa hil egin da, EITBk baieztatu duenez.

Lasesarre futbol-zelaiaren inguruan gertatu zen erasoa, 20:30 inguruan. Eusko Jaurlaritzako Segurtasun Sailak zabaldutako informazioaren arabera, gizon batek auto baten barrutik hainbat tiro egin zizkion beste bati eskopeta batekin. 

Bertaratu ziren osasun-zerbitzuek bertan artatu ondoren, Gurutzetako Ospitalera eraman zuten biktima, sabelaldean zauri larriak zituela, eta bertan hil da.

Tiroketa egin ondoren, ustezko egileak ihes egin zuen, Volkswagen Touareg beltz batean antza, eta handik gutxira atxilotu zuten, Amurrion. 

Atxilotua, 48 urtekoa, ertzain-etxera eraman zuten, hilketa saiakera egotzita. Ertzaintzak ikertzen jarraitzen du, baina baliteke indarkeria matxista kasu bat izatea. 

Alkateak babesa helarazi die senideei

Amaia del Campo Barakaldoko alkateak gertatutakoa gaitzetsi du, eta biktimaren senideen eskura jarri ditu Udalaren baliabideak, bizi izan duten "galera izugarriaren aurrean".

"Barakaldoren izenean, gure maitasuna eta doluminak helarazi nahi dizkiet biktimaren familiari eta lagunei, une mingarri hauetan", adierazi du. Halaber, nabarmendu duenez, "oso zaila da horrelako albiste baten aurrean hitzak aurkitzea: pertsona batek modu izugarrian galdu du bizia, eta familia batek orain aurre egin behar dio imajinatu ere egin ezin dugun minari".

Alkateak azaldu duenez, Udalak familiari lagundu nahi dio eta une hauetan behar dituen baliabide guztiak bere eskura jarri nahi ditu. Era berean, alkateak larrialdi-zerbitzuek eta Ertzaintzak egindako lana aitortu du, "erruduna oso azkar atxilotzeko egindako lan bikainagatik".

Susmagarria, epailearen esku uzteko zain

Hilketaren susmagarria atxilotuta jarraitzen du, gertakariak izan ziren egunetik, epailearen aurrera noiz eramango zain.