"Gehiegizko prezioan erosi ezean, kalera": Erandion etxegabetzeko arriskuan dauden familien beldurra

Erandioko Los Ochos auzoko 120 familia inguru euren etxeetan bizitzen jarraitu ahal izatea eskatzeko mobilizatuko dira gaur. Lehen alokairu-kontratuak urriaren 1ean amaituko dira, eta bizilagunek salatu dute higiezinen jabe den inbertsio-funtsak ez dituela berritu nahi eta etxebizitzak saldu egin nahi dituela.

Marivik 78 urte ditu eta kaltetuetako bat da: Radio Euskadin egindako adierazpenetan, auzokide batzuek etxetik alde egiteko presioak jaso dituztela salatu du. "Bizilagunak beldurtzen dabiltza etxeak utz ditzaten", adierazi du.

Bere testigantzaren arabera, 12.000 euro eskaini dizkiete bizilagun batzuei euren etxebizitzak uzteko, eta etxebizitza batzuk 300.000 euro baino gehiagoren truke eskaintzen ari dira higiezinen plataformetan. "Guk alde egiteko modua bilatzen ari dira. Izugarria da", adierazi du.

"Urriaren 1ean ateraino etorriko zaizkigu bila, baina hemen geratuko gara", adierazi du Marivik, eta azaldu du lau bilera egin dituela gizarte-laguntzailearekin eta bat Erandioko alkatearekin. Azaldu duenez, jasotako erantzuna izan da erakundeek ezin dutela jardun etxegabetzea gertatu arte. 

Victoria Abeciak 16 urte daramatza eraikinean, eta urriaren 1etik aurrera egoerari aurre egin beharko dion lehen bizilagunetako bat dela esan du. "Hilaren 1ean amaituko da epea, lehenengoetakoak gara", azaldu du.

Azaldu duenez, burofax bat jaso zuen apirilean, eta ordutik "oso gaizki" dabil. "Errenta guztiak ordaindu ditut, pisua gurea balitz bezala zaindu dut", adierazi du.

Joseba Elosegik 15 urte daramatza eraikinean, eta beldur da etxe gabe geratuko ote den. "Hilero ordaintzen dut alokairua. Neurriz kanpoko prezioan erosi ezea, kalera", adierazi du. Azaldu duenez, pisu batzuk erosteko 400.000 euro inguru eskatzen dituzte. "Ez dugu nora joan. Beti bizi izan naiz Erandion", gaineratu du.

Felix Alonsok 15 urte daramatza Los Ochosen bizitzen, eta gogora ekarri du familiek urte asko daramatzatela pisuetan, eta garai batean erosten saiatu zirela. "Bizitza osoa daramagu hemen bizitzen. Inmocaixari etxea erostea eskaini genion", azaldu du. Azaldu duenez, hau erantzun zioten: "Zure kontratua amaitzen denean, akabo".

Familiek mobilizazioa deitu dute ostegun honetarako, 19:00etan, Erandion, konponbidea eskatzeko eta erakundeen eta herritarren babesa galdegiteko.

Marivik espero du protestak bere egoera ikusarazteko balio izatea. "Espero dezagun gaur arratsaldekoak oihartzuna izatea. Jendeak gurekin bat egin dezan, herri bat baikara", adierazi du.

"Gaur gu gaude honetan, eta bihar haiei edo euren seme-alabei gerta dakieke", gaineratu du.