Usurbilen deskarga elektriko bat jasota hildako adingabearen heriotzaren auzia berriz irekitzeko agindu dute

2025eko martxoan Usurbilgo goi-tentsioko dorre batean deskarga elektriko bat jasota hildako 11 urteko mutikoaren heriotzari buruzko ikerketa berriro irekitzeko agindu du Gipuzkoako Probintzia Auzitegiak. 

Auzitegiak baliogabetu egin du instrukzio-epaitegiak erabakitako auziaren behin-behineko artxibatzea, eta uste du dorrearen jabe diren enpresek eta mantentze-lanez arduratzen den enpresak (Tremefil-Izaguirre eta Urumeako Elektronika) zuhurtziagabekeriagatiko hilketaren eta zuhurtziagabekeriagatiko lesioen balizko delituen zantzuak dituztela.

Ebazpenak ez dakar kondenarik, baizik eta balizko erantzukizunak ikertzen jarraitzeko arrazoiak ikusten ditu. Hala, Audientziak ikertu gisa deklarazioa hartzea agindu die enpresa jabearen bi administratzaileei eta mantentze-konpainiako ahaldun eta zuzendari teknikoari.

Era berean, Eusko Jaurlaritzako Industria Sailari eta Usurbilgo Udalari azalpenak eskatu dizkie inguru horretan egindako ikuskapenei, segurtasun-neurriei eta obrei buruz.

Eusko Jaurlaritzaren txosten tekniko baten arabera, instalazioak segurtasun-gabeziak zituen: eskailerara sartzea eragotzi behar zuen tranpolak ez zuen eraginkortasunik, eskaladaren aurkako elementuak falta ziren eta arrisku elektrikoko seinaleak ez ziren egokiak.

Dorrea espaloi baten eta oinezkoentzako gune baten ondoan zegoen, 2024an egokitua. Beraz, instalazio maiztutzat hartu behar zen, eta dagozkion babes-neurriak izan behar zituen. Auzitegiaren ustez, neurri horiek ez hartzeak istripua eragin zezakeen zantzuak daude. Halaber, nabarmendu du, gertakariaren ondoren, eskaladaren aurkako hesiak jarri zirela, eskailerarako sarbidea aldatu zela eta kanpoko hesia jarri zela.

Azkenik, bizirik atera diren bi adingabeen lesioen azterketa mediko-forentsea eskatu du.

Gertakaria 2025eko martxoaren 15ean izan zen, 18:10ean, Usurbilgo Errota Berri inguruan. Hiru adingabe Atxega jatetxean zeuden familia ospakizun batean, establezimendutik atera ziren eta horietako bi goi-tentsioko dorrera igo ziren.

Lekukoek adierazi zutenez, leherketa moduko bat entzun zen eta poligonoa argi barik geratu zen.

Dorrera igo ez zen hirugarren adingabea jatetxera itzuli zen gertatutakoaren berri emateko, inguruan zeuden bi helduk larrialdi-zerbitzuei deitzen zieten bitartean.

Zaurituak, 11 urteko mutiko bat eta 15 urteko neskato bat, lehengusuak ziren, eta Donostia Ospitalera eraman zituzten hasiera batean. Ondoren, Gurutzetako Ospitaleko Erredura Handien Unitatera eraman zuten mutikoa, larri, eta han hil zen. Egun berean eman zioten alta neskatoari.