Janukovitxek eta Ukrainako oposizioak su-etena adostu dute

Viktor Janukovitx Ukrainako presidenteak eta oposizioak su-etena adostu dute gaur. Kieveko istiluak herrialdearen mendebaldera hedatu dira asteazken honetan, eta dagoeneko 26 hildako utzi dituzte.

"Albiste onak daude. Orain su-etena adostu dute eta egoera baretzeko negoziatzen hasi dira", adierazi du Arseni Jatseniuk Batkivstxina (Aberria) oposizioko alderdi nagusiaren buruzagiak.

Gainera, Kieveko Independentzia plazaren aurkako "erasoa bertan behera" geratu dela azpimarratu du. Oposizioko manifestariek ia hiru hilabete daramatzate Maidan izenaz ere ezagutzen duten plaza horretan.

Diplomaziaren ahalegina

Diplomazia mugitzen hasi da Ukrainan, Kieveko sarraskiaren ostean. Bertan, gutxienez 26 pertsona hil dira azken orduotan, Polizia Maidan plazan (protesten erdigunea) oldartuta.

Bild egunkari alemaniarraren arabera, Viktor Janukovitx presidenteak oposizioarekin lehenbailehen batzartzeko asmoa agertu du, Vitali Klitxko oposizioko buruak iragarri duenez. "Presidenteak beste bilera bat nahi du, gaur bertan, eta gu prest gaude", esan du Klitxkok. Oposizioko buruaren esanetan, "gure eskakizuna argia da: Poliziaren hedapena bertan behera geratzea. Jazarpena berehala gelditu behar da negoziatu ahal izateko".

Gaur goizaldean ere negoziazioak egin dituzte Klitxkok eta Janukovitxek, baina ez dute akordiorik lortu.

Ukrainak terrorismoaren aurkako operazioa iragarri du

Ukrainako segurtasun indarrek terrorismoaren aurkako operazioa iragarri dute asteazken honetan lurralde nazionalean, asteartean Kieven izandako indarkeriazko gehiegikerien ondorioz 25 pertsona hil ostean.

"Terrorismoaren aurkako operazio bat egiteko erabakiaren berri eman diot dagoeneko presidenteari", azaldu du Alexandr Jakimenko Ukrainako Segurtasun Zerbitzuko buruak.

Frantziako, Alemaniako eta Poloniako Kanpo ministroak, Kieverako bidean

Frantzia, Alemania eta Polonia herrialdeetako Kanpo Arazoetako ministroak Kievera joango dira ostegun honetan, lehenengo pertsonan Ukrainak bizi duen egoera ezagutzeko, Frantziako Kanpo Arazoetako ministroak iragarri duenez.

"Atzerapenik gabe, Poloniako eta Alemaniako nire homologoekin bihar goizean goiz Kievera joatea erabaki dut arratsaldeko Bruselako bilera baino lehen lehenengo informazioak jasotzeko", azaldu du Laurent Fabius Frantziako ministroak.

Herriaren aurka indarra ez erabiltzea eskatu du NATOk

NATOk Ukrainako buruei herriaren aurka indar militarra ez erabiltzea eskatu die, 26 pertsona (horien artean 10 polizia) hil diren enfrentamenduen ostean.

"NATOko komandante militarra izanik, buruzagi arduradunei Ukrainako herriaren aurka indarkeria militarraren erabilera ekiditea eskatzen diet", azaldu du Twitterreko kontuan.

Baliteke Europak isunak ezartzea

Testuinguru honetan, Europar Batasuneko (EB) Atzerri ministroek bilera egingo dute bihar, Ukrainako Gobernuari isunak ezartzea aztertzeko.

Catherin Ashton EBko Atzerri Politikako buruak segurtasun batzordearen premiazko bilera deitu du gaurko. "Aukera guztiak aztertuko ditugu, jazarpena eta giza eskubideen urraketa direla eta", esan du.

Nazioartearen gaitzespena

Azken orduetako indarkeriak nazioartearen gaitzespen irmoa ekarri du, eta Gobernuari jazarpena bertan behera uzteko agindu diote.

Jose Manuel Durao Barroso Europako Batzordeko presidentea azken orduotan Ukrainan gertatu denarekin "harrituta" eta "haserre" agertu da.

Ildo berean, Francoise Hollande Frantziako presidenteak isunak jartzea eta "Poliziaren jazarpena" bukatzeko eskatu du.

Cark Bildt Suediako Atzerri ministroak hitz egin du irmoen: "Argi esan behar dugu: heriotzen eta indarkeriaren erantzulea Janukovitx presidentea da. Odolez zikinduta ditu eskuak".

Frantzisko aita santuak indarkeria amaitzeko eskatu die "alde guztiei".

Halaber, Angela Merkel Alemaniako kantzilerrak Vladimir Putin Errusiako presidenteari deitu dio, eta, harekin, Ukrainan "indarkeria bolada ekiditeko ahalegin guztiak egitea" adostu du.

Barack Obama AEBko presidenteak manifestarien kontra indarkeriarik ez erabiltzeko eskatu dio Ukrainako Gobernuari, eta "era egokian" jarduteko "lehen arduraduna" dela azaldu du.