Guterres: "Bada garaia palestinarrei Estatu palestinar bat izango duten itxaropena emateko"

Antonio Guterres Nazio Batuen Erakundeko idazkari nagusiak larunbat honetan adierazi duenez, beharrezkoa da Gazako Zerrendan su-etena adostea, Hamasen esku dauden bahituak askatzea eta Estatu palestinar independente bat sortzeko aukeraren inguruan itxaropena ematea.

"Bada garaia palestinarrei Estatu palestinar bat izango duten itxaropena emateko", esan du Guterresek Egiptoko Arish aireportutik, Sinai penintsula eta Gazako Zerrenda lotzen dituen Rafahko igarobidea bisitatu ondoren. 

NBEko buruak azpimarratu duenez, "ahal den guztia" egin behar da Israelek Rafahko erasoa saihesteko, kontuan izanik han errefuxiatuta eta pilatuta daudela Gaza osotik urriaren 7tik hona desplazatutako 1,5 milioi pertsona. 

"Denek izango dituzte erantzukizunak Historiaren aurrean. Nik argi daukat: Rafah egoera katastrofiko batera iristea saihestu behar dugu", esan du Guterresek, eta erantsi du "erabat ados" daudela AEB, Europar Batasuna, NBE eta nazioarte osoa, lurreko balizko eraso hori gaitzesteko. 

Rafahn balizko eraso baten ondorioak leuntzeko zer egin daitekeen galdetuta, Guterresek zera erantzun du: "Ez iezadazue galdetu nola berma dezakedan Israelgo Gobernuak bata edo bestea egin dezan, argi baitago Israelgo Gobernuak, normalean, ez duela eskatzen diodan ezer egiten". 

Era berean, deitoratu duenez, gaur-gaurkoz, oztopo ugari daude Gazako Zerrendara laguntza humanitarioa helarazteko, hango biztanleek goseteari aurre egiten ari diren bitartean. Era berean, ziurtatu du laguntza hori sartu ahal izateko beharrezkoa dela su-etena adostea. 

"Ez dago Gazan laguntza modu eraginkor batean banatzerik su-eten humanitariorik gabe", azpimarratu du Guterresek, eta gogorarazi du gertatu izan dela Zerrendara laguntza sartu ahal izan denean "banatzeko orduan indarkeria egoerak sortu izan direla, eta herritarrak bonbardatu ere egin dituztela", janariaren bila joan direnean. 

Gainera, Israelgo agintariek ezarritako oztopoak salatu ditu, zenbait artikulu atzera botatzea, egunak hartzen dituzten ikuskapenak eta konboiak sartzea debekatzea, besteak beste. "Badira Israelgo agintariek ezarri dituzten eta indarrean dituzten hainbat oztopo, ikaragarri zailtzen dutenak behar den adina laguntza sartu ahal izatea", deitoratu du Nazio Batuen Erakundeko buruak. 

Egiptora iristean, Guterres Sinai Iparraldeko gobernadore Mohamed Shosharekin bildu da, eta hark esan dionez, Israelek jarritako oztopoen erruz, 7.000 kamioi daude mugan, Gazan sartu ezinik, tokiko administrazioaren ohar baten arabera.

Guterresek bira labur bat abiatu du gaur Ekialde Hurbilean. Kairon izango da, eta bertan ramadaneko baraualdia hautsiko du errefuxiatu sudandarrekin; Jordaniara joango da igandean, bertako agintariekin biltzeko, eta Errefuxiatu Palestinarrentzako NBEren UNRWA Agentziak han dituen instalazioak bisitatzeko.