Mundu osoko gobernuek Ekialde Hurbilean tentsioa baretzeko deia egin dute

Israelek apirilaren 1ean Iranek Damaskon (Siria) duen kontsulatuaren aurka egindako erasoari Iranek emandako erantzunak mundu osoko gobernuen erreakzioak ekarri ditu; gehienak deseskalatzearen eta tentsioak gutxitzearen aldekoak dira.

Ekialde Hurbilean, Egipton, Arabiar Emirerri Batuetan, Qatarren eta Saudi Arabian, "kezka handia" agertu dute eskualdeko egoeraren bilakaeraren aurrean, eta tentsioa murrizteko neurriak, moderazioa eta elkarrizketa eskatu dituzte.

Asiako herrialdeen artean, Errusia eta Txina ere kezkatuta agertu dira "eskalada arriskutsuagatik", eta aldeei lasaitasunez eta neurriz jokatzeko deia egin diete, egoerak okerrera egin ez dezan. Pakistanek, Txinak eta Japoniak ere egoera baretzearen alde egin dute.

Ildo beretik mintzatu dira Europako hainbat buruzagi eta gobernu ordezkari; Espainiakoak, Irlandakoak, Herbehereetakoak eta Suitzakoak, tartean. Belgikak Gazan su-etena deitzeko eskatu du, eskualdeko tentsioa arintzeko.

Bestalde, Austriak, Hungariak, Frantziak eta Alemaniak "irmo" gaitzetsi dituzte Iranek Israelen aurka egindako erasoak.

Macronek Israelekiko "konpromisoa" berretsi du, bai eta "bazkideen eta eskualdeen egonkortasunarekikoa" ere.

Steffen Hebestreit Alemaniako Gobernuko bozeramaileak adierazi duenez, "ordu zail hauetan, Alemania Israelen ondoan dago".

Austriako eta Hungariako gobernuek Iranek Israelen aurka egindako erasoa gaitzetsi dute, eta Tel Avivi elkartasuna adierazi diote.

Austriako gobernuburuak, Karl Nehammer kontserbadoreak, honakoa idatzi du X sarean: "Austriak Israel babesten du, eta Irani eskatzen diogu liskarrak bazter uzteko".

Hungarian, Viktor Orban lehen ministro ultranazionalistak gaitzetsi egin du erasoa. "Gaitzetsi egiten dut bart Israelen aurka egindako erasoa, eta otoitz egiten dugu Israelen segurtasunaren alde", esan du Orbanek.

Ameriketan, AEBk ez ezik, Kanadak, Mexikok, Argentinak, Uruguaik eta Paraguaik ere gaitzetsi dute Iranek Israelen aurka egindako erasoa. Israeli babes irmoa emateaz gain, herrialde horiek nazioarteari eskatu diote neurri erabakigarriak har ditzala estatu juduaren segurtasuna bermatzeko eta etorkizuneko erasoak prebenitzeko.

Ekuadorrek eta Peruk bezala, horiek ere Ekialde Hurbilean egonkortasuna eta bakea mantentzearen garrantzia nabarmendu dute, eta nazioarteko zuzenbidea urratzen dutenak eta segurtasun globala mehatxatzen dutenak erantzule egin behar direla nabarmendu dute. 

Aitzitik, ezkerreko buruzagiek gobernatzen dituzten nazioek (Venezuela, Kuba, Nikaragua eta Bolivia) ez dute, momentuz, adierazpen publikorik egin erasoaren inguruan.