UNRWA: "Gazari laguntzeko Israelen eredua distrakzioa da, ankerkeriak ikus ez ditzagun"

Ekialde Hurbileko Errefuxiatu Palestinarrentzako NBEren Agentziak (UNRWA) gaur salatu duenez, Gazari laguntza emateko Israelen eredua "zarrastelkeria" eta "distrakzioa" da, "ankerkeriak" ikus ez ditzagun. Horrela, aste honetan AEBk babestutako fundazioak abiatutako banaketa kaotikoa kritikatu du agentziak.

Asteartean, milaka palestinar joan ziren Rafah hirian eraikitako banaketa gunera, Gaza hegoaldean, Israelen eta Gazako Fundazio Humanitarioaren (GHF) zaintzapean. Elikagaiak lortzeko etsipenak Israelek ezarritako kontrolak gainezkarazi zituen.

"Israelek proposatutako laguntza banatzeko eredua ez dator bat oinarrizko printzipio humanitarioekin", adierazi du Philippe Lazzarini UNRWAren ordezkari nagusiak, Tokion (Japonia) egindako agerraldian.

"Atzo goseak jota, janari premiaz, dagoen biztanleriaren irudi lazgarriak ikusi genituen. Kaotikoa, duingabea eta segurtasunik bakoa izan zen", gaineratu du Lazzarinik. "Baliabideak alferrik galtzea eta ankerkerien aurrean arreta galaraztea dela uste dut", errepikatu du.

Bere langileetako baten "exekuzioa"

Gainera, UNRWAk salatu duenez, Israelgo Armadak martxoan egindako "exekuzioaren" biktima izan zen bere langile bat, eta kasuaren inguruko ikerketa independentea egitea eskatu du.

"Inpunitateak ankerkeria gehiagori ireki die atea", deitoratu du Lazzarinik, erakundeak "duela gutxi" bildutako informazioaren zati bat sare sozialetan azaldu duenean.

Kamal da, martxoaren 23an Rafahko etxetik atera zen, Zerrendako hegoaldean, Nazio Batuen txaleko bat jantzita eta "argi markatutako" ibilgailu batean. Ordubete geroago, lagunek arrastoa galdu zioten, eta astebetez egon agertu barik.

Martxoaren 30ean aurkitu zuten haren gorpua, Palestinako Ilargi Gorriko langileen gorpuzkiak zeuden hobi komun batean, Lazzarinik azaldu duenez. Gorpuari egindako azterketek agerian utzi dute "Kamal garezurraren atzealdean egindako tiro baten edo askoren ondorioz hil zela".

Erakundeko arduradun nagusiak Israelgo Gobernuari leporatu dio kasuaren inguruko informaziorik ez ematea, eta Kamalen modura biktima "ugari" daudela erantsi du. Azkenik, armada sionistari gogorarazi dio UNRWAren lantaldeak eta beharginak ezin direla erail.