Israelek Asad Abu Sharia hil du, Palestinako Mujahidinen Mugimenduko buruzagia

Israelgo Armadak Asad Abu Sharia Palestinako Mujahidinen Mugimenduko burua hil du gaur Gaza hiriko auzo batean egin duen erasoan, militar israeldarrek eta erakunde palestinarrak jakinarazi dutenez. Bitartean, janari-banaketak egiten jarraitzen dute, nahiz eta batzuetan istiluak sortu. Hain zuzen ere, Wadi Gazako banaketa-zentroan 5 hildako eta 121 zauritu utzi ditu Israelgo Armadak.

Palestinako Mujahidinen Mugimendua Zisjordaniako Gobernuan agintzen duen Al Fatahren zatiketa batetik sortu zen, eta urteak daramatza Gazako Zerrendan Hamasekin batera elkarlanean. Israelgo Armadak 2023ko urriaren 7ko erasoan parte hartzea eta Pitta Nattapong bahitu thailandiarra hiltzea egozten die talde horren adar armatuari (Mujahidinen Brigadak).

Gainera, Israelen arabera, 1.200 israeldarren heriotza eragin zuen "sarraskiaren buruetako bat" izan zen Abu Sharia, eta Shiri, Ariel eta Kfir Bibas familiaren bahiketan eta hilketan zuzenean parte hartu zuen.

Palestinako Erresistentzia Batzordeek ere baieztatu dute Abu Sharia eta Ahmed anaia Sabra auzoan izandako eraso batean hil direla. Mujahidinen Mugimenduak goratu egin du hildako buruzagiaren irudia, "Palestinako jihadaren eta erresistentziaren zutarrietako bat" izan delakoan. 

Hildakoak janariak banatzeko guneetan

5 pertsona hil eta 121 zauritu dira Gazako Zerrendan janariak banatzeko gune batean, Wadi Gazako zentroan, hain zuzen ere.

Sare sozialen bitartez, AEBk iragarri zuen Wadi Gazako banaketa-zentroa zabalduko zuela. Janariak ordubetez banatu ostean, Gazako Federazio Humanitarioak itxi egingo zuela iragarri zuen.

Orduan hasi ziren istiluak, estatubatuarrek piperbeltz gasa jaurti zietenean gazatarrei. Handik gutxira, Israelgo Armada tiroka hasi zen, eta 5 hildako eta 121 zauritu utzi zituen.