Israelek Gazaren aurka egindako erasoek 100 pertsona baino gehiago hil dituzte astelehenetik

Israelek Gazaren aurka egindako erasoek ehundik gora palestinar hil dituzte astelehenetik, Zerrendako Osasun Ministerioak emandako azken balantzearen arabera.

Gutxienez 88 pertsona hil zituzten astelehenean, eta asteartean beste 20 palestinar hil dituzte Israelen bonbardaketek. Gainera, beste bost gorpu berreskuratu dituzte hondakinen artetik azken orduetan, Osasun Ministerioak erantsi duenez.

Agintari palestinarren arabera, gutxienez 2.500 gorpu daude oraindik hondakinen artean, eta, kasu gehienetan, defentsa zibileko taldeak ezin dira horietara iritsi, Israelek husteko agindua emandako eremuetan daudelako.

Israelen erasoak areagotzeak eta makineriaren gabeziak ere zaildu egiten dituzte erreskate lan horiek, eta su-etena iritsiko balitz erraztu egingo lirateke, Zaher Al Waheidi Osasun Ministerioko arduradunak azpimarratu duenez.

Zaurituei dagokienez, azken 24 orduetan 200 baino gehiago iritsi dira Zerrendan martxan jarraitzen duten ospitale bakanetara, iparraldean ez baitago zabalik bakar bat ere.

Zisjordaniaren anexioa

Bestalde, Israelek Zisjordaniaren anexioan aurrera jarraitzen du, indar militarren eta kolonoen hilketak, erasoak eta jazarpena areagotuz, baita milaka etxebizitza eraitsiz eta palestinarren joan-etorriak mugatuz eta behartuz ere, Nazio Batuen Giza Eskubideen Bulegoak gaur salatu duenez.

Israelek Zisjordaniaren aurkako ‘Burdinazko Harresia’ operazioa abiarazi zuenetik, urte hasieran, 30.000 palestinarrek desplazatuta jarraitzen dute.

Erakundeak salatu du Israelgo indarrek armarik gabeko palestinarren aurka tiro egin dutela, baita Yenin, Tulkarem eta Nur Shams errefuxiatu-eremuetan etxera itzultzen saiatzen ari zirenen kontra ere.

Joan den hilean soilik, kolonoek bi hamarkada baino gehiagotan egindako erasoen ondorioz hildako palestinarren kopuru handiena zenbatu zuen NBEk, 96 guztira. Gainera, urteko lehen seihilekoan mota horretako 757 eraso izan dira, palestinarrei biktimak edo kalte materialak eragin dizkietenak.

Azken horien artean, nabarmentzekoa da Zisjordaniako iparraldean 1.400 etxebizitza eraitsi izana, Israelgo segurtasun indarrek aginduta, Thameen Al-Kheetan bozeramaileak Genevan Nazio Batuen Erakundean kazetariei azaldu dienez.

Gainera, kolono talde batek CNN telebista-kateko lantalde baten aurkako erasoa egin du Zisjordanian, israeldarrek Ramala hiritik gertu lintxatu duten palestinar-estatubatuar baten heriotzaren berri ematen ari zela, hedabide horretako kazetari batek salatu duenez.

Erabakirik ez EBn eta dimisioak NBEko batzordean

Hala eta guztiz ere, Europar Batasunak Israelekiko harremanen berrikuspena erabakirik hartu gabe bukatu du gaur, baina Israelen aurkako presioari eusteko eta egoera humanitarioa hobetzeko errepresaliak mahai gainean mantenduko dituela dio, Zerrendan laguntza humanitarioa areagotzeko asmoz.

Horrez gain, Israelen eta Okupatutako Lurralde Palestinarren Giza Eskubideen gehiegikeriak ikertzeaz arduratzen diren Nazio Batuen Erakundeko batzorde bateko hiru kideek dimisioa aurkeztu berri dute. Danny Danon Israelek Nazio Batuen Erakundean duen ordezkari iraunkorrak erabakia txalotu du berehala.

Batzordea 2021ean sortu zen, eta Navi Pillayk --2008tik 2014ra Nazio Batuen Erakundeko Giza Eskubideetarako goi komisarioa izandakoa-- Chris Sidotik eta Miloon Kotharik osatzen zuten. Israelek batzordea gogor kritikatu izan du.