Laguntza humanitariorako 35 kamioi sartu dira Gazan, Israelek "10 orduko" etenaldi militarra iragarri ostean

Nazio Batuen Erakundearen (NBE) Munduko Elikagai Programako 35 kamioi sartu dira Gazako iparraldean igande honetan, Israelek bost egun Zikimeko pasabidean atxikita izan ondoren. Biztanleriak, goseak etsita, konboi bakoitza zeharkatu bezain laster inguratu dituzte, edukia hustuz. Izan ere, NBEk ez baitie eskolta armaturik ematen beren kamioiei.

Gainera, Jordaniak eta Arabiar Emirerri Batuakek 25 tona laguntza humanitario jaurti dituzte airetik Gazara, C-130 hegazkinekin egindako operazio batean. Hornigaiek, lurraldeko hainbat eremutan banatuta, Israelen blokeoak eragindako elikadura-krisi larria arintzea dute helburu; izan ere, gutxienez 133 pertsona hil dira desnutrizioaren ondorioz gerra hasi zenetik, tartean 87 adingabe.

Igande honetan, laguntza humanitarioko dozenaka kamioi Egiptotik Gazako Zerrendara bidaiatzen hasi dira, Rafah mugako pasabidetik, Israelgo ikuskapenak tartean. Egiptoko kateek zuzenean igorritako irudiek konboien irteera erakutsi dute, oinarrizko elikagaiekin eta hornidurekin kargatuta, eta Israelek "etenaldi taktikotzat" jo du erasoaldiaren geldiunea.

Laguntza banaketa berri hau bat dator Israelgo Armadak jakinarazitako estrategia berriarekin; hain zuzen ere, armadak iragarri du egunero "hamar orduko" etena izango omen duela zenbait gunetako operazio militarretan, "laguntzaren banaketa errazteko".

Hala ere, Egiptoko iturrien arabera, Israelek Rafah lurralde palestinarra kontrolpean izateak une oro baldintzatu du laguntza humanitarioa sartzea. Horrenbestez, Egipton asteetan gordetako produktuak ezin izan dira banatu.

Era berean, Israelek aireko laguntza humanitarioa berriz hasi duela dio; alegia, irina, azukrea eta elikagai latatuak dituzten paketeekin.

Erabakiak testuinguru kritiko batean ematen dira. Izan ere, Gazako osasun agintarien arabera, gutxienez 127 pertsona (horietatik 85 adingabeak) hil dira desnutrizioaren ondorioz, Israelek 2023ko urrian erasoaldia hasi zuenetik.

Biren bitartean, Palestinaren aldeko erakundeek ekimen zibilen aurkako ekintzak salatu dituzte. Askatasunaren Ontzidia, Handala itsasontzia, laguntza humanitarioa Gazara zeramana, Israelgo Armadak nazioarteko uretan bortizki geldiarazi duela jakinarazi dute.

Esan bezala, Handala itsasontziaren atzematea muturreko krisi humanitario baten erdigunean ematen da, non gero eta handiagoa den biztanleentzat laguntza kanal jasangarriak eta seguruak desblokeatzeko presioa.

Hildakoek ez dute "etenaldirik"

Gutxienez 31 hildako izan dira bart Gazan, laguntza humanitarioaren zain zirelarik. Hala, hildakoak izan dira berriro ere, nahiz eta Israelek iragarri duen "10 orduko" etenaldi militarrak egingo dituen, laguntza humanitarioa sartzea ahalbidetzeko.