Charlie Kirk aktibista hiltzeko erabili duten arma aurkitu dute

Charlie Kirk komentarista, Donald Trump AEBko presidentearen aliatu estua, tiroz hil dute Utahko unibertsitate batean izandako ekitaldi jendetsu batean. Poliziak tirokatzeko erabili duten arma aurkitu du eta ustezko hiltzailearen "irudi onak" dituela jakinarazi du.

Make America Great Again (MAGA) mugimenduko 31 urteko ekintzaile kontserbadoreak tiro bat jaso du lepoan, Utah Valley Unibertsitatean (UVU) 2.000 pertsonaren aurrean izandako eztabaidan parte hartzen ari zela.

"Charlie Kirk handia eta mitikoa hil da", esan du Trumpek Truth Social plataforman. Egoera kritikoan Timpanogos ospitalera eraman eta gutxira hil da, Orem hirian, Utah estatuan.

Tiroa AEBko indarkeria armatuari buruz hitz egin eta berehala gertatu da, eta ekitaldian izan den jendetzak unea harrapatu harrapatu du bideoz eta sare sozialetan zabaldu du.

Hasiera batean, unibertsitateak jakinarazi du susmagarri bat atxilotu dutela, baina ondoren jakin da atxilotua ez dela tiroaren egilea.

FBIa eta Utahko Segurtasun Publikoko Departamentua ari dira hilketa ikertzen. Arduradunek jakinarazi dutenez ustezko hiltzailearen "irudi onak" dituzte. Unibertsitate-adina izan dezakeela uste dute. 

Beau Mason Segurtasun Publikoko ordezkariaren hitzetan, susmagarria identifikatzeko lanetan ari dira "irudiak aztertzeko teknologia erabiliz". FBIk hilketarekin harremana duen "intereseko pertsona" baten irudiak zabaldu ditu, baina ez du zehaztu susmagarria ote den.

Horrez gainera, hilketa burutzeko erabili den fusila ere aurkitu dute unibertsitatetik gertu dagoen baso-eremu batean. "Potentzia handiko erriflea" dela zehaztu du Masonek.

Ikertzaileek ustez, campuseko teilatu batetik egin du tiro hiltzaileak, Kirk zegoen eszenatokitik 180 metrora. 

Charlie Kirken heriotzaren berri izan ostean, Donald Trumpek igande arratsaldera arte banderak haga erdian jartzeko agindua eman du eta iragarri du Askatasunaren Domina Presidentziala, herrialdeko kondekorazio zibil altuena, ezarriko diola.

Politikarien erreakzioak

AEBko politikari askok hilketa gaitzetsi eta doluminak eskaini dituzte. 

J.D Vance presidenteordeak eskuineko aktibistaren alde otoitz egitea eskatu dute. "Emaiozu, Jauna, betiereko atsedena", esan du sare sozialetan.

"Charlie Kirken aurkako erasoa nazkagarria, zitala eta gaitzesgarria da. Estatu Batuetan, indarkeria politikoa mota guztietan errefusatu behar dugu", adierazi du Gavin Newsom Kaliforniako gobernadoreak.

"Charlie lagun hurbila eta isilpekoa zen. Askok biziki harrituko dute. Buruzagi politiko guztiek gogor gaitzetsi behar dute indarkeria hori. Gure otoitzak emaztearekin eta seme-alaba txikiekin daude. Har dezatela atseden bakean", idatzi du Mike Johnson Ordezkarien Ganberako presidenteak.

1993ko urrian Illinoisen jaioa, Kirk ezkonduta zegoen eta bi seme-alaben aita zen. Aktibista, idazlea eta iruzkingilea zen, batez ere Turning Point sortu zuelako, balio kontserbadoreak sustatzen dituen ikasle-erakundea.

Arizona estatuan bizi zen, AEBetako hego-mendebaldean, eta unibertsitateko eztabaidetan parte hartzen zuen, bere ideiak ikasle aurrerakoien ideiekin aurrez aurre jarriz.

Gainera, Kirkek babesa eman zion Trumpi iazko hauteskunde-kanpainako hainbat mitinetan, eta gaur egungo presidentearen inbestidura ekitaldian egon zen.

Utahko bere ekitaldia bere lehen bitaren parte zen, herrialdeko hainbat unibertsitatek gazteak mobilizatzeko planifikatua.