Palestinako Estatuaren aitortza erdigunean dela abiatuko  da NBEren 80. Batzar Nagusian

Astearte honetan hasiko da, New Yorken, urtero munduko buruzagi nagusiak biltzen dituen Nazio Batuen Erakundearen Batzar Nagusia. 80. edizioa polemikaz zipriztinduta iritsi da, abuztu amaieran AEBko Gobernuak erabaki baitzuen Mahmud Abbas presidente palestinarrari eta 80 funtzionario palestinarri Nazio Batuen Batzar Nagusian parte hartzen ez uztea, eta nazioartearen protestak gorabehera, ez du atzera egin erabaki horretan.

Nolanahi ere, Varsen Aghabekian Palestinako Aginte Nazionaleko Atzerri ministroa itxaropentsu agertu da Batzar Nagusia hasi baino lehen, "aste gogoangarria eta esanguratsua" izango delako, hainbat herrialdek Palestinako Estatua onartzea espero baita.

Aghabekianen ustez, Mendebaldeko potentzia handiek, hala nola Erresuma Batuak, Kanadak eta Australiak, ekimen horrekin bat egiteak "itxaropen mezu bat helarazten dio herri palestinarrari", Israelgo Armada Gazako hiriaren inbasioan murgilduta dagoen bitartean, bertako biztanle guztiak hegoaldera mugitzera behartuta.

"Okupazioa da eskualdeko ezegonkortasunaren eta herri palestinarraren sufrimenduaren funtsezko arrazoia", esan du, eta bi Estaturen aldeko apustua berretsi du.

Testuinguru horretan, Keir Stermar Erresuma Batuko lehen ministroak Palestinako Estatua onartu du ofizialki gaur arratsaldeko lehen orduan, eta gauza bera egin dute Kanadak, Australiak eta Portugalek ere. Hala, mundu osoko 150 herrialdek baino gehiagok onartzen dute Palestinako Estatua. Gaurko erabakiarekin, Palestinako Estatua aitortu duten G7ko lehen herrialdeak dira Erresuma Batua eta Kanada. Astelehenean bertan, Frantziak gauza bera egin du.

Analista askoren ustez, Palestinako Estatua aitortzeak ez du Israel Gazan egiten ari den erasoa geldituko, baina are nabarmenago utziko du AEBren eta Israelen bakardadea. Izan ere, gobernu ultraeskuindarren (Hungaria eta Argentina, besteak beste) eta Pazifikoko hainbat estatu txikiren babesa bakarrik dute.

AEBko hainbat kongresistak "zigorrak" jartzeko mehatxua egin diete Palestinako Estatua onartzen duten herrialdeei

Ameriketako Estatu Batuetako Alderdi Errepublikanoko 25 kongresistak gutun bat bidali diete Frantziari, Kanadari, Erresuma Batuari eta Australiari, NBEren Batzar Nagusian Palestinako Estatua aitortzeko asmoa dutela iragarri baitute.

Kongresista horien esanetan, erabaki hori "terrorismoarentzako saria" da, eta "zigor neurriak" hartuko dituztela ohartarazi dute.

Netanyahuk esan du Palestinako Estatua onartzearen aurka borrokatuko dela

"Nazioarteak datozen egunetan entzungo gaitu", ohartarazi du Israelgo lehen ministroak NBEren bilerara joan aurretik.

Netanyahu "egia" defendatzera igoko da berriro Batzar Nagusiko atrilera, eta bere estrategia defendatuko du: "bakea indarra baliatuz lortzea".

"Ez da estatu palestinarrik egongo", ohartarazi du, eta Palestinaren kolonizazio proiektuekin jarraituko dutela azpimarratu du.

"Mezu argia dut urriaren 7ko sarraskiaren ondoren Palestinako Estatua aitortzen duten buruzagientzat: terrorismoari sari handia ematen ari zarete", adierazi du Netanyahuk sare sozialetan argitaratutako bideo batean.

"Ez da gertatuko. Jordan mendebaldean ez da estatu palestinarrik egongo", gaineratu du Israelgo agintariak Londres, Ottawa eta Canberraren iragarpenari erantzunez.

Israelek "Judeako eta Samariako (Zisjordania) kolonoguneak bikoiztu ditu eta bide horretatik jarraituko dugu", nabarmendu du.

"Gure lurraren bihotzean estatu terrorista bat inposatzeko saiakera berri honi erantzuna Estatu Batuetatik itzultzen denean emango zaio. Itxaron", gaineratu du.

Bestalde, Bezalel Smotrich eta Itamar Ben Gvir buruzagi ultranazionalista eta ministro israeldarrek Israelek Zisjordania formalki anexionatzea planteatu dute igande honetan, Palestinako Estatua aitortzeko azken iragarpenei erantzuteko.

Smotrich Finantza ministro eta Alderdi Nazional Erlijiosoa-Sionismo Erlijiosoko buruak X sarean duen kontuan adierazi duenez, "Israelen aurkako maniobraren erantzun bakarra Judean eta Samarian (Zisjordania) herri juduaren aberriaren gaineko subiranotasuna hartzea eta Palestinako Estatuaren ideia zentzugabea behin betiko ezabatzea da".

Hala, hori egiteko eskatu dio, zuzenean, Likud alderdiko Benjamin Netanyahu Israelgo lehen ministroari: "Lehen ministro jauna, unea orain da, eta zure esku dago".

Ministroak azpimarratu du Zisjordania anexionatzeko proposamen zehatz bat aurkezteko asmoa duela Israelgo Ministroen Kontseiluaren hurrengo bileran.