"Su-etena berriro indarrean" jarri duela ziurtatu du Israelek, igande honetako bonbardaketen ostean
Benjamin Netanyahu Israelgo lehen ministroak "helburu terroristen aurka gogor" ekiteko eskatu dio Armadari, Rafahn izan den gertakizun batean bi soldatu galdu ostean. Gutxienez 36 lagun hil dituzte eta laguntza humanitarioa Gazara sartzea debekatu dute. Hamasek su-etena betetzen ari dela defendatu du eta beste gorpu bat aurkitu dutela iragarri du.
Aire-erasoak Gazako Zerrendan. Argazkia: EFE.
Israelgo Armada Gazan "su-etena aplikatzen hasi da berriro" gaur gauean, egunean zehar Gazako zerrenda osoan hainbat bonbardaketa egin ostean. Goizean bi soldadu galdu ditu Rafahn izan den gertakari batean eta horri erantzunez egin ditu erasoak.
Komunikatu labur batean, Armadak azaldu du Israelgo Gobernuaren aginduei jarraitu diela, eta gaineratu du "su-eten akordioa aplikatzen jarraituko duela baina edozein urraketari irmo erantzungo diola".
Benjamin Netanyahu lehen ministroak Gazako "helburu terroristak" berriz bonbardatzeko agindua eman du goizean, Rafah hirian ustez miliziano gazatarren eta tropa israeldarren artean tiroketa izan ondoren. Agindu hori jaso ostean, Israelgo Armadak hainbat aire-eraso egin ditu, eta gutxienez 36 pertsona hil ditu Gazako hainbat eremutan, Palestinako ospitaleetako iturriek jakitera eman dutenez.
20:30ak arte (17:30 GMT) Gazako ospitaleetako gorputegietako datuekin egindako zenbaketaren arabera, hildako gehienak, 30 guztira, Al Awda eta Al Aqsako Martiriak ospitaleetara eraman dituzte. Beste hiru Shifa ospitalera (iparraldean) eta beste hiru Nasserrera (hegoaldean).
Hildakoen artean haurrak eta emakumeak daude, baita Al Jazeera bezalako nazioarteko hedabideetarako zuzeneko emanaldiak egiten zituen ekoiztetxe bateko talde bat ere.
Bonbardaketa horiek Rafahn (Gazako hegoaldea) gertatu den tiroketa bati Israelek emandako erantzuna izan dira.
Izan ere, bi militar israeldar hil eta beste hiru zauritu dira milizia palestinarren eraso batean, Israelgo Indar Armatuek ohar baten bidez zabaldu dutenez.
"26 urteko Yaniv Kula eta 21 urteko Itay Yavetz hil dituzten gertakarian, FDIen Gazako dibisioko soldadu erreserbista bat larri zauritu dute. Soldadua ospitale batera eraman dute arreta medikoa jasotzeko, eta haren familiari jakinarazi zaio", zabaldu du Armadak ohar batean.
Gertakaria 10:30 aldera izan da, Rafako hego-ekialdean, Saladinoko errepidetik gertu eta Lerro Horiaren ekialdean, su-eten akordioan aurreikusitako Israelgo indarren kontrolpean dagoen erretiratze lerroan.
Militarrek zabaldu dutenez, miliziano talde bat tunel batetik atera eta RPG bonbak jaurti dituzte hondeamakina baten aurka, eta bi soldadu hil dituzte. Frankotiratzaileek beste hondeamakina bat jo dute eta beste bi militar zauritu dira, horietako bat larri. Handik gutxira, frankotiratzaileek hirugarren militar bat jo dute.
Hamasek eta Al Qasam Brigadak (Hamaseko talde armatua) esan dute ez dutela inolako zerikusirik gertatuarekin. Gazako Zerrendako eremu guztietan su-etenarekiko "konpromiso osoa" dutela adierazi, eta ez dutela liskar horiekin zerikusirik izan nabarmendu dute.
Aitzitik, Hamasek salatu du Israel dela su-etena "nahita" urratzen ari dena, eta gogorarazi du urriaren 10ean su-etena indarrean sartu zenetik 46 pertsona hil eta 132 zauritu dituztela Israelgo tropek.
Al Qasam Brigadako bi kide. Argazkia: EuropaPress
Israelek dio su-etenak indarrean jarraitzen duela, baina bere tropak babes daitezkeela
Israelek su-eten akordioa ez betetzea leporatzen dio Hamas talde palestinarrari, eta Israelgo Armadak Hamasen aurka "gogor erantzungo" duela adierazi du.
Avichay Adraee Israelgo Armadako arabierazko bozeramaileak euren tropek kontrolatzen duten Gazako eremuan ez sartzeko esan die gazatarreie eta bertan egon daitezkeenei berehala alde egiteko eskatu die, su-etenaren "marra horiaren" mendebaldeko eremua "borroka eremu oso arriskutsua" delako.
Shosh Bedrosian Israelgo Gobernuko bozeramaileak adierazi duenez, duela bederatzi egun indarrean sartu zen su-etenak indarrean jarraitzen du, baina bere tropei "babesteko baimena" eman zaiela gaineratu du.
"Gaur egun su-eten batean gaude, baina soldaduei euren burua babesten uzten diegu", esan du prentsaurreko birtual batean, Rafahn gertatuaz galdetuta.
Urriaren 10ean sinatu zen "akordioaren zatia mantendu" duela Israelek esan du, eta nabarmendu du Hamasek "bitartekariekin duen konpromisoari eusteko" betebeharra duela, "Donald Trump presidentea barne, eta falta diren bahituak itzultzeko betebeharra" duela.
Hamasek adierazi du ahal duten guztia egiten ari direla hondakinen azpian lurperatutako gorpuak berreskuratzeko.
Atzo gauean bi bahitu israeldarren gorpuzkiak entregatu zituzten, eta igande honetan Al Qasam Brigadek jakinarazi dute hildako bahitu israeldar baten gorpua aurkitu dutela, eta ohartarazi dute edozein eskalada militarrek hura entregatzea oztopatuko duela.
Gurutze Gorria gorpuzkiak garraiatzen. Argazkia: EuropaPress
Laguntza humanitarioa zeramaten kamioiak Egiptora itzuli dira Israelek Rafahn egindako erasoaren ostean
Bestalde, elikagaiz, produktu medikoz eta higienerako produktuz betetako kamioi kopuru handi bat Egiptoren ondora itzuli da, Israelgo Armadak Rafah ingurua bonbardatu ostean, Egiptoko Ilargi Gorriko iturri batek jakinarazi duenez.
"Kamioi asko itzuli dira", adierazi du zehaztu gabe zenbat diren Egiptora itzuli diren ibilgailuak. 200 kamioik osatzen zuten konboia.
Rafahko mugako pasabideak itxita jarraitzen du eta Israelek esan du ez duela utziko laguntza humanitariorik sartzen, gaur gertatu denari erantzun gisa.
Zure interesekoa izan daiteke
Macronek eta EBk babesa adierazi diote Espainiari, Trumpen mehatxu komertzialen aurrean
Sanchezek esker ona adierazi du, EBko erakunde nagusietako presidenteek eta Europako bazkideek (Frantziak, esaterako) laguntza eskaintzeko dei eta mezuak bidali dizkiotelako.
Israelek Iranek izendatutako edozein buruzagi hil egingo duela ohartarazi du Israel Katz Defentsa ministroak
Israelgo aireko armadak asteartean eraso egin zion Ali Khamenei aiatolaren ondorengoa aukeratzeko Adituen Batzordea biltzekoa zen eraikinari, Qom hiri santuan, izendapen prozesua etenarazteko ahaleginean. Hala ere, une horretan 88 erlijio-gizonak ez zeuden eraikinean bilduta.
Trumpek Espainiarekin duen merkataritza-harremana etengo duela mehatxu egin du, Irango gerrarekiko duen jarreragatik
Espainiako Gobernuak Trumpi erantzun dio, eta nabarmendu diu NATO eta Europako Defentsa konpromisoak bete egiten dituela. Era berean, ohartarazi dio EBren eta AEBren arteko akordioak errespetatu beharko dituela, aldebiko harremanak berrikusi nahi baditu.
Sidenor auziko epaileak mediku palestinar bat onartu du biktima eta akusazio partikular gisa
Akusazio partikular horrekin, Sidenorreko hiru arduradunak kontrabando delituaz gain, genozidio delituaren, gizateriaren aurkako delituaren eta gatazka armatuan babestutako pertsonen eta ondasunen aurkako delituan konplize gisa ikertu ahal izateko baldintza beteko litzateke. Fiskalak Sidenorreko erregistroak baliogabetzeko eskatua zuen, eta kontrabandoa ez beste delituen akusazioak erretiratzea, hain zuzen ere, baldintza hori betetzen ez zelako. Ikusteko dago, orain, ikerketak zer norabide hartuko duen.
Von der Leyenek Ekialde Hurbileko krisiaren "ondorioei" aurre egiteko prest egotea eskatu dio EBri
Frantzia prest agertu da Iranen erasoen aurrean Golkoko eta Jordaniako herrialdeen defentsan parte hartzeko, eta Alemaniak, berriz, baztertu egin du Iranen aurkako erasoarekin bat egitea, eta bere tropek eskualdean duten papera autodefentsara mugatuko du.
Israelek Iranen lur azpiko kuartelei eraso die, Teheranen
Israelgo Armadaren arabera, 100 eraso baino gehiago egin ditu lurpeko kuartelen kontra, eta jaurtitzeko baseak eta misil balistikoak ere suntsitu ditu. Azpimarratu duenez, "behar beste denbora" iraungo du gerrak . Larunbatetik, 555 pertsona hil dituzte Iranen, Ilargi Gorriaren arabera.
Petrolioaren prezioak gora egin du eta gorabeherak daude itsas eta aire trafikoan, Ormuzko itsasarteko tentsioaren ondorioz
Ontzi enpresa nagusiek ez dute handik igaro nahi, eta zer gertatuko zain daude. Halaber, 3.000 hegaldi baino gehiago bertan behera utzi dituzte asteburuan, Ekialde Hurbileko gatazka lehertu denetik.
Albistea izango dira: Gatazka Iranen, Makina-Erremintaren Azoka eta martxoaren 3aren aurreko eguna
Gaurkoan Orain-en albiste izango direnen laburpena, bi hitzetan.
Hezbollak Libanotik eraso dio Israeli, eta Israelgo Armadak Beirut bonbardatu du
Donald Trump AEBko presidenteak Venezuelaren antzeko trantsizioa proposatu du Iraneraok, eta erasoaldiak "lau aste edo gutxiago" iraun dezakeela adierazi du.
EBk ohartarazi du Ekialde Hurbilak asko duela galtzeko gerra batekin, eta "moderazioa" eskatu du
Europar Batasuneko Kanpo ministroek azken orduotako erasoak salatu dituzte, eta Ormuzko itsasartean zirkulazioa etetea saihesteko eskatu dute, besteak beste.