Europako liderren babesa bilatu du Zelenskik Macronekin izan duen bileran, "gerrari amaiera justu eta luzarokoa" emateko

Volodimir Zelenski Ukrainako presidenteak Europar Batasuneko buruzagien babesa izan nahi du AEBrekin dituen negoziazioei begira, "gerrari segurtasun bermeekin amaiera” eman ahal izateko. Helburu horrekin joan da Parisera. Emmanuelle Macron Frantziako presidentearekin bilera egin du, azken egunetan Ukrainak eta AEBk izan dituzten negoziazioei buruz eztabaidatzeko.

Horrez gainera, bi agintariak Steve Witkoff Ukrainarako AEBko ordezkari bereziarekin eta Keir Starmer Erresuma Batuko lehen ministroarekin bideokonferentziaz hitz egin dute, asteburuan Floridan AEBko eta Ukrainako ordezkaritzek izandako elkarrizketei buruz. Hain zuzen ere, Witkoff Errusiara joango da, asteartean Vladimir Putin presidentearekin biltzeko eta negoziazioetan landu duten dokumentua aurkezteko.

Gainera, Zelenskik eta Macronek bideokonferentziak izan dituzte Europar Batasuneko zazpi herrialdetako liderrekin (Alemania, Polonia, Italia, Norvegia, Finlandia, Danimarka eta Herbehereak), Antonio Costa Europako Kontseiluaren presidentearekin, Ursula von der Leyen Europako Batzordearen presidentearekin eta Mark Rutte NATOren idazkari nagusiarekin.

Batzar horietan Europarentzat "funtsezkoak diren lehentasunei buruzko eztabaida oso emankorra" izan dutela azpimarratu du Zelenskik. Halaber, azaldu duenez, Europan bilerak prestatzen ari dira, gerrak "amaiera justua" izan dezan.

Azkenik, Ukrainako presidenteak hitz eman du Europako buruzagiekin "koordinatzen" jarraituko duela.

Gai zailena: lurraldeen banaketa

AEBren ordezkariekin izandako negoziazioei dagokienez, Zelenskik onartu du gairik zailena Donbasseko eta Krimeako lurrak banatzea dela. AEBren hasierako planak jasotzen zuen Ukrainak Errusiaren esku utzi behar zituela Donbassen kontrolpean daukan zatia, baina Kievek onartezintzat jotzen du hori.

Beste gai nagusietako bat Ukraina berreraikitzea finantzatzeko modua da. Ukrainako presidenteak azpimarratu du Europako herrialdeen arteko akordio bat funtsezkoa dela puntu horretan. Izan ere, AEBk Errusiako aktibo izoztuak zeregin horretara bideratzea proposatu zuen eta horien irabazien erdia haientzako izatea. Zelenskiren iritziz, "ez da bidezkoa europarrentzat" eta irtenbide egoki bat bilatu behar da.

Ukrainako presidentearen hitzetan, negoziatzaileen taldeak egindako lanari esker, “bake-plana orain hobea” da.

Bestalde, Macronek esan du Ukraina dela lurraldeari buruzko "erabakiak har ditzakeen bakarra", eta Errusiari leporatu dio "bakea nahi izatearen seinalerik ez” ematea.

Bien bitartean, Europar Batasuna Errusiaren aurkako zigorrak indartzeko lanean ari dela adierazi du, "gerra finantzatzeko diru gutxiago izan dezan". Macronek azaldu duenez, petrolio esportazioen gaineko blokeoaz gainera, orain blokeoa gainditzen duen “flota mamuaren” aurkako borrokan hasiko dira.