Gaur iritsiko dira Madrilera Venezuelak aske utzi dituen bi preso bilbotarrak

Jose Maria Basoa eta Andres Martinez bilbotarrak aske utzi zituen atzo Venezuelak, eta gaur bertan iritsiko dira Madrilera, handik etxerako bidea har dezaten. CNI Espainiako zerbitzu sekretuetako kide izatea eta Nicolas Maduro presidentearen aurkako atentatua prestatzen aritzea leporatuta, 2024ko irailean atxilotu zituzten biak. 

Jorge Rodriguez Venezuelako Asanblea Nazionaleko presidenteak presoak askatuko zituztela iragarri zuen atzo goizean, eta handik ordu gutxira baieztatu zuten libre utzi dituzten aurreneko presoen artean zeudela bi euskal herritarrak. Espainiako Gobernuko Atzerri Gaietako Ministerioak ohar batean azaldu zuen espainiar nazionalitatea duten bost preso askatu dituztela denera. 

Oharrean, Jose Manuel Albaresek zuzentzen duen Ministerioak albistea txalotu zuen, eta bere "poza" adierazi die aske geratu diren herritarrei zein haien familiei. 

Jose Maria Basoa eta Andres Martinez Puerto Ayacuchon atxilotu zituzten, Venezuelako Amazonas estatuko hiriburuan, Kolonbiako mugatik oso gertu. CNIren eta Venezuelako oposizioarekin lotura izatea leporatu zieten. Espainiako Gobernuak hasieratik ukatu ditu akusazio horiek. 

Lehen erreakzioak

Albistea zabaldu orduko, erreakzioak bata bestearen atzetik iritsi ziren. Imanol Pradales lehendakaria izan zen hitz egiten aurrenetakoa, X sare sozialean zabaldutako mezu baten bidez. Bertan, aurreratu zue gaur itzuliko direla etxera bi bilbotarrak. "Andres Martinez eta Jose Maria Basoa bihar itzuliko dira etxera, Maduroren erregimenaren erabakiagatik Venezuelako espetxe batean urtebete eta erdi modu bidegabean atxilotuta egon ondoren", idatzi zuen. 

Biei Eusko Jaurlaritzaren "babes osoa" azaldu ondoren, "nazioarteko legezkotasuna, oinarrizko berme judizialak eta giza eskubideak" eskatzen jarraituko dutela ziurtatu zuen.

Bide beretik, Aitor Esteban EBBko presidentea "pozik" agertu zen,  eta gogor salatu zuen bi bilbotarrek Venezuelan bizi izan duten "espetxealdi bidegabe eta arbitrarioa".  "Aspalditik zain geunden albistea da. Espetxealdi bidegabe eta arbitrarioa. Ongi etorri", idatzi zuen sare sozialetan. 

Pedro Sanchez Espainiako Gobernuko presidenteak ere presoak askatzea berri ona dela esan zuen. "Venezuelan urtebete baino gehiago atxikita eman duten espainiarren askapena ospatzen dugu", idatzi zuen Sanchezek X sarean. 

Hainbat ekimen

Atxilotu zituztenetik, Basoaren eta Martinezen senideek hainbat ekimen egin dituzte. Besteak beste,  joan den urriaren 23an, adierazpen bat irakurri zuten Eusko Legebiltzarrean, Venezuelako Gobernuari euren etxekoak askatzeko exijituz. Barbara Basoak, Jose Maria Basoaren arreba, esan zuen akusazio guztiak faltsuak direla, eta ez dagoela leporatzen zaizkien delituak frogatzeko inolako zantzurik. 

Abenduaren 23an, berriz, Espainiako presidenteak hartu zituen bi familiak, eta hitz eman zien eskura dituzten baliabideak erabiliko dituztela, bi presoak lehenbailehen askatzeko eta aberriratzeko.