Iranen erakunde nagusien aurkako eraso masiboa egin dute AEBk eta Israelek

Donald Trump AEBko presidenteak larunbat honetan iragarri duenez, "eraso handia" hasi dute larunbat honetan, Irango erakunde nagusien aurka, "AEBko herria babesteko, Irango erregimenaren mehatxua deuseztatuta".

Bestalde, Benjamin Netanyahu Israelgo lehen ministroak adierazi du Irango erregimenaren "mehatxu existentziala ezabatzeko" helburua duela erasoak.

Irandarren eta estatubatuarren arteko negoziazio nuklearrek aurrera egin duten arren, tentsio handiko egunak igaro dira. Erasoaldia larunbatean hasi da, eta Israelgo Defentsa Ministerioak iragarri du, bertan 08:15 zirenean.

Handik minutu gutxira, leherketak entzuten hasi dira Teheranen eta herrialdeko beste hiri batzuetan.

Israelek eta AEBk larunbat honetan Iranen kontra jaurtitako drone, bonba eta misilek gutxienez 201 hildako eta 747 zauritu utzi dituzte, Irango Ilargi Gorriak zehaztu duenez; herrialdeko 31 probintzietatik 24 harrapatu dituzte, eta 220 talde baino gehiago ari dira larrialdi lanetan. Eraso larrienen artean, Minab hirian, Shajareh Tayybeh neskatoen lehen hezkuntzako eskolaren aurkako bonbardaketa dago, gutxienez 85 hildako eragin dituena, gehienak neskak. Masoud Pezeshkian Irango presidentearen arabera, “ekintza barbaroa” izan da. Beste eraso batek Lamerdeko kirol-pabiloi bat jo du, eta gutxienez 15 pertsona hil dira.

Erantzun gisa, Irango Guardia Iraultzaileak misilak eta droneak jaurti ditu Israelen eta AEBetako baseetan, Bareinen, Qatarren eta Arabiar Emirerri Batuetan. Sirena antiaereoak entzun dira Jerusalemen eta beste hiri batzuetan, eta misilak eta leherketak jaurti dituzte. Masud Pezeshkian Irango presidenteak “ekintza barbarotzat” jo ditu erasoak, eta herrialdeko buruzagi gorenak ondo daudela ziurtatu du.

Israelek ziurtatu du Irango erregimenaren “funtsezko hainbat figura” hil dituela, besteak beste, Ali Jamenei Errepublika Islamikoko buruzagi gorena. Hala ere, Irango hedabideek diote bizirik dagoela eta herrialdea defendatzeko ekintza militarrak zuzentzen jarraitzen duela.

Tentsioaren gorakadak alarma handia piztu du nazioartean. Testuinguru horretan, Kaja Kallas Europar Batasuneko goi ordezkariak eskualdean funtsezkoak ez diren diplomazialariak erretiratzeko deia egin du, eta Iran mehatxu globala dela azpimarratu du.

Halaber, Pedro Sanchez, Ursula von der Leyen, Antonio Costa eta Emmanuel Macron Europako buruzagiek moderazioa eta zibilen segurtasuna zaintzea eskatu dute. Volker Türk NBEko giza eskubideen goi komisionatuak ohartarazi du gatazka are zabalagoa izateko arriskua dagoela, eta horrek ondorio suntsitzaileak dakarzkiela herritar zibilei.