Bruselak telelana derrigorrez ezartzea proposatu du, prezioen igoeraren eta Ormuzeko tentsioaren aurrean

Europako Batzordea premiazko neurri sorta bat lantzen ari da prezioen igoeraren eragina arintzeko eta Ormuzko itsasartearen blokeoak eta gatazkak eragindako ezegonkortasunari aurre egiteko. Besteak beste, telelaneko nahitaezko egun bat ezartzea, garraio publikoa merkatzea eta hegazkinez egiten diren bidaiak murriztea proposatzen dute.

Halaber, ahal denean eraikin publikoak ixtea, autobideetako abiadura-mugak murriztea, hegazkin bidaiak ekiditea  eta sukaldean elektrizitatearen erabilera sustatzea proposatu dute, erregaien eta gas natural likidotuarekiko mendekotasuna murrizteko.

Gomendio horiek guztiak Zipren apirilaren 23an eta 24an egitekoa den goi-bileran jakinaraziko dira.

Dokumentua zirriborro fasean dago oraindik, eta datorren astean aurkeztuko dute, estatu kideak neurriak egokitzen eta ezartzen hasi daitezen. Europak azpimarratu duenez, ez dago hornidurarako berehalako mehatxurik, baina onartzen dute egoera "delikatua" dela eta gatazkaren bilakaeraren mende dagoela.

Iranek ohartarazi duenez, tentsioa gora doa, eta nazioarteko merkatuek zain jarraitzen dute. Teheranek azpimarratu du esportazioak eta inportazioak blokeatuko dituela Persiar golkoan, Omango itsasoan eta Itsaso Gorrian, mehatxuek bere horretan jarraitzen badute.

Testuinguru horretan, Pakistango negoziazioetan dago begirada jarrita, tentsioa murrizteko funtsezkoak direlakoan. Ziurgabetasuna agerian geratu da hainbat sektore ekonomikotan, gatazka luzatzeak zer eragingo duen zain.

Euskadin, Javier Hurtado Turismo sailburuak garrantzia kendu die, oraingoz, sektorean izan ditzakeen ondorioei, baina onartu du etorkizuna gerraren bilakaeraren eta krisiaren iraupenaren araberakoa izango dela.