Iranen eta AEBren akordioa gertu egon daiteke: Pakistanek baieztatu du testua adostu eta lanean jarraitzen dutela

Ameriketako Estatu Batuen eta Iranen arteko negoziazioek etenik gabe jarraitzen dute, eta azken orduetan aurrerapauso handiak izan dira. Shehbaz Sharif elkarrizketetan bitartekari lanetan ari den Pakistango lehen ministroaren arabera, "Iranek eta AEBk azken testu bat adostu dute".

Elkarrizketetan parte hartzen ari diren aldeek sare sozialak aukeratu dituzte azken berriak emateko eta "desinformazioari" aurre egiteko, X sarea besteak beste. Sharifek argitaratu duen mezuan, "hurrengo urratsak" ixteko helburuarekin "estuki lanean" jarraitzen dutela aitortu du.

Estatu Batuetako Gobernua gustura agertu da adostutako testuarekin. AEBren helburuak betetzen dituela eta Ekialde Hurbilera bake iraunkorra eramango duela baieztatu dute Etxe Zuriko iturriek.

Ostiral arratsaldean mezu baikorra bidali du Seyed Abbas Araghchi, Irango Atzerri ministroak ere.  Bere hitzen arabera, orain arte, “inoiz ez da hain gertu egon" AEBrekin "elkar ulertzeko memorandumik".

"Inoiz baino gertuago gaude akordio batetik. Egun batean edo bitan zehaztu daiteke, edo datozen egunotan", adierazi du. Halaber, berretsi du aldeek "negoziazioak amaitu bezain laster" emango dutela horren berri, eta zehaztu du bakoitzak "digitalki" sinatuko duela, ekitaldi bat egitea baztertuta.

Hala ere, hedabideei mezua helarazi die. "Akordioaren amaieraren zain" dauden bitartean, "edukiari buruzko espekulazioetan ez sartzeko" eskatu die.

Ministroaren bozeramaileak ere onartu du testuaren berrikuspena amaitzen ari direla eta, momentuz, ezin duela sinadurari buruzko daturik eman.

Donald Trump AEBko presidenteak Araghchiren mezua berrargitaratu du Truth Socialeko bere kontuan.

Alabaina, aurretik haserre agertu da Iranekin, IRNA albiste-agentzia ofizialak Washingtonen eta Teheranen arteko "berehalako akordio" bati buruzko bere iragarpenaren gaineko zuzenketak egin dituelako. 

Trumpek osteguean aurreratu zuen akordioa asteburu honetan bertan sinatu daitekeela Europan. IRNAk, ordea, adostutakoa "elkar ulertzeko memorandum bat baino ez" dela adierazi du. Testua "ia amaituta" dagoela onartu du, baina negoziatzen jarraitzen dutela, eta nabarmendu du Iranek tinko jarraitzen duela bere marra gorrietan.

Albiste agentzia ofizialaren arabera, adostu dutenak "ez du barne hartzen nuklearren arloko akordiorik, ezta AEBk Irani ezarritako zigorrak kentzea ere". Bi gai horiek 60 eguneko epean hasiko den negoziazio berri batean sartuko direla ziurtatzen du. Negoziazio horretan hitz egingo lukete baita ere gerran izandako kalteengatik “Iranek jaso beharreko konpentsazioaz”.

IRNAren aburuz, Iran "beste aldearekiko mesfidantza osoz" ari da negoziatzen, eta “hitz emandakoak betetzen ez badira edo engainuak egonez gero, guztiz prest” dagoela aurreratu du.

Informazio horien aurrean, eta Araghchiren iragarpenaren aurretik, Trumpek gogor hitz egin du Iranen aurka. Esan du "albiste faltsuen hedabideetan filtratutako” terminoek ez dutela “idatziz adostutako terminoekin zerikusirik” eta irandarrekin ez dagoela "fede onez negoziatzerik".

Negoziaketak izan diren bitartean erasoak eta bonbardaketak etengabeak izan dira Ekialde Hurbilean. Apirilaren 8an su-etena hasi zenetik egon den eskalada militarrik okerrena bizi izan dute azken egunetan.