Tenperatura itogarriak larunbat honetan Euskadin: 37 ºC-ra iritsiko dira barnealdean
Gaua bereziki beroa izango da lurraldeko leku askotan. Hori dela eta., abisu horia ezarri du Segurtasun Sailak. Horrez gain, egunez tenperatura altuak espero dira, eta igandean 37 ºC-ra hel daitezke termometroak Araba eta Nafarroa hegoaldean.
Udako giroa asteburu honetan. Argazkia: Lorentxo Portularrume
Euskadik beroari egingo dio aurre asteburu honetan, eta ez bakarrik egunez, baita gauez ere. Hori dela eta, Segurtasun Sailak abisu horia ezarri du tenperatura altuengatik larunbateko 13:00etatik 20:00etara. Maximoak 35 ºC ingurukoak izango dira Arabako hegoaldean eta 32 ºC ingurukoak Arabako gainerako eskualdeetan, 31 ºC ingurukoak Bizkaiko eta Gipuzkoako barnealdean eta 26 ºC ingurukoak kostaldean. Termometroak 35 ºC-ra irits litezke Nafarroa erdialdean, eta 37 ºC-tik pasa litezke Ebro ibarrean.
Halaber, iragarri duenez, tenperaturak ohi baino altuagoak izango dira larunbateko gauerditik igandeko 20:00ak arte, eta, ondorioz, abisu horia izango da indarrean, tenperatura iraunkorrak tarteko.
Gaueko minimoak nekez jaitsiko dira 19 ºC-tik kostaldean, eta 17 ºC ingurukoak izango dira Bizkaiko eta Gipuzkoako barnealdean. Araban, minimoak 17 ºC-koak izango dira erdialdean eta 18 ºC-koak lurraldearen hegoaldean. Gaueko giro bero horrek atsedena zaildu eta etxe eta eraikinetan beroa batzea erraztu dezake.
Bestalde, igandean, 12:00etatik 20:00etara, maximoak 34 ºC ingurukoak izan daitezke isurialde atlantikoan, 35 ºC-koak trantsizio-eremuan eta 37 ºC-koak Ebro ibarrean. Bestalde, tenperatura maximoak 28 ºC ingurukoak izango dira kostaldean.
Igandean, abisu horia ezarriko dute tenperatura altu iraunkorrengatik; izan ere, minimoak eta maximoak 19-28 ºC-koak izan daitezke kostaldean, 17-34 ºC-koak barnealdean, 17-35 ºC-koak trantsizio-eremuan eta 18-37 ºC-koak Ebro ibarrean.
Segurtasun Sailak gogorarazi du oso garrantzitsua dela beroa saihesteko neurriak hartzea, etengabe hidratatzea eta egunaren erdiko orduetan eguzkitan luzaro ez egotea.
Osasun alerta gorria Ebroko Erriberan
Nafarroako Osasun Publikoaren eta Lan Osasunaren Institutuak ostiral honetan azpimarratu duenez, arreta handiz ibili behar da datozen egunetan Ebroko Erriberan, tenperatura oso altuak izango baitira, osasun alerta gorria ezarri behar izaterainokoak.
Nafarroan, gehiegizko tenperaturak eta airearen kutsadurak osasunean dituzten ondorioak prebenitzeko plan bat dago. Plan horrek lau arrisku-maila ditu (berdea, horia, laranja eta gorria), eta pertsona bakoitzak bere populazio-taldearen arabera interpretatu behar du.
Zehazki, alerta gorriak honako hauek dakartza: aparteko arrisku-faktorerik gabeko biztanleentzat, arrisku ertaina; arrisku handia, 65 urtetik gorakoentzat eta arrisku-faktoreren bat duten 65 urtetik beherakoentzat; eta muturreko arriskua, arrisku-faktore gehigarriak diutzten 65 urtetik gorakoentzat.
Hala ere, Foru Gobernuaren arabera, 2024an bero-kolpeen ondorioz artatu zituzten herritarren % 76,8k ez zuten arrisku-faktorerik, eta horietan garrantzi handiagoa izan zuten beroak erasandako pertsonek egiten zituzten jarduerek, batez ere lanarekin eta ariketa fisikoarekin lotutakoak, baina baita, esfortzu fisikorik egin gabe ere, eguzkitan edo tenperatura altuetan egotea eskatzen zuten aisialdiarekin lotutako jarduerek ere.
Lan-eremuan kontu handiz ibiltzeko eskatu dute, eta oso garrantzitsutzat jo dute tenperatura handiagatiko osasun-alerta ezarritako egunetan enpresek identifikatzea eta ebaluatzea deserosotasuna eta estres termikoa izateko arriskua, langileak arriskuan ez jartzeko.
Aldi berean, muturreko tenperaturekiko esposizioari dagokionez, osasunaren zaintza espezifikoa bermatu behar da, arreta berezia jarriz langile kalteberei. Halaber, berora egokitzeko prozesua errespetatzeko gomendatzen da, egunak behar izaten baitira.
Zure interesekoa izan daiteke
Nola bizi zituzten eklipseak gure arbasoek?
Munduko kultura askotan eguzkia gurtu izan da ia jainko bat bezala. Naturalena gauez ezkutatu eta goizean itzultzea zen. Horregatik, egunez eklipse bat ikustea beldurgarria izan da urte askotan munduko ia kultura guztientzat.
Hodeiak nagusi asteburuan
Ekaineko lehen asteburu honetan, fronte berri bat izango dugu, eta hodeitza nagusi izango da larunbatean; igandean, berriz, tenperaturak nabarmen egingo du gora.
Lainoak, eguzkia joan-etorrika eta euri zirina
Eguraldia aldakor ibiliko da datozen egunetan. Orokorrean, ez du asko bustiko, baina euritarako joera egongo da hainbat egunetan. Eguzkia ere azalduko da tarteka, eta tenperaturak gorabeheratsu ibiliko dira, egunaren arabera.
Eguzki eklipse osoaren hiru fenomenoak ikusgai, errealitate areagotuari esker
Bailyko perlak, diamante eraztuna eta eguzki koroa ikusgarria abuztuaren 12ko 20:27tik aurrera ikusi ahal izango dira. Eguraldiko lantaldeak fenomeno horiek erakutsi dizkigu gertakari astronomiko garrantzitsu horri buruzko erreportajeen hirugarren atalean.
Amaitu da beroaldia, Arabako eta Nafarroako hainbat tokitan salbu
Tenperatura maximoak 10 gradu inguru jaitsiko dira kostaldean, eta altuenak 25 gradutik behera kokatuko dira. Barnealdean, oro har, 25 eta 30 gradu artean ibiliko dira altuenak, baina Arabako Errioxan eta Nafarroako Erriberan 35 gradutik gorakoak izan litezke.
Bero itogarria zazpigarren egunez, nahiz eta kostaldean brisak atseden pixka bat eman duen
Kantauri isurialdeko barnealdeko bailaretan neurtu dituzte maximoak. Laudio, esaterako, 38,5 gradura iritsi da, inoiz maiatzean izan den altuena. Bihar, osteguna, alerta laranjan jarraituko dugu tenperatura altu iraunkorrengatik.
Alerta laranja ezarri dute beroagatik, baina kostaldean brisa sartu eta tenperatura maximoak jaitsi egingo dira
Barnealdean tenperatura maximoak bere horretan mantenduko dira. Ostegunean berriro alerta laranja aktibatuko da eta ostiralean maximoak nabarmen jaitsiko dira.
Beroak ez du atsedenik ematen eta tenperatura minimo historikoak utzi ditu
Gaua tropikala izan da, batez ere kostaldean eta isurialde kantauriarrean. EAEko lau estazio meteorologikoek minimo historikoak errejistratu dituzte, udan ere inoiz ez dira hain tenperatura altuak jaso. Ondoren, egunean zehar, hainbat udalerrik 35 ºC-ak gainditu dituzte, nahiz eta maiatzean egon.
Beroagatik alerta laranja ezarriko dute asteazkenean eta ostegunean
Eusko Jaurlaritzak baso sute arriskuagatik ere abisu horia ezarriko du, tenperatura altuei hegoaldeko haizea gehitu beharko zaielako.
Beste egun bero bat: Gau tropikalaren ondotik 36 graduko tenperatura maximoak espero dira
Bizkaiko eta Gipuzkoako hainbat tokitan tenperaturak ez dira 25 gradutik jaitsi goizaldean, eta egunean zehar baliorik beroenak 36 graduraino igoko dira. Sargori egingo du eta beroagatik ezarritako abisu horia gutxienez asteazkenera arte egongo da indarrean.