Ekaitz bortitzek arazoak sortu dituzte Nafarroan
Tutera eta Iruñea lotzen dituen autobidea itxi egin behar izan dute, euri eta txingor ekaitz handia izan baita. Tuteran, zezen plazako hegal baten zati bat erori da. Gainera, Castejon eta Erriberri arteko tren zerbitzua bertan behera utzi behar izan dute, hiru zuhaitz katenaria gainera erori baitira.
Zenbait egunetan tenperatura altuak eta zerua oskarbi egon ondoren, aldaketa iritsi da.
Eusko Jaurlaritzako Segurtasun Sailak alerta laranja ezarri du ostiral arratsalderako Araban eta Bizkaia eta Gipuzkoa barnealdean, zaparrada handiak espero zirelako, batez ere Araban. 30 litro baino gehiago pilatu dira ordubetean zenbait tokitan. Horrela, Nanclares Okan 38,3 litro bota ditu ordubetean, Subillan 31,5 eta Espejon 23. Txingorra ere bota du txoko batzuetan.
Ekaitz gogorrak Erriberan
Nafarroan, Tutera eta Iruñea lotzen dituen autobidea itxi egin behar izan dute, euri eta txingor ekaitz handia izan baita.
Tuteran, zezen plazako hegal baten zati bat erori da. Zorionez, plaza itxita zegoen eta ez da inor zauritu.
Gainera, Adifek jakinarazi duenez, Castejon eta Erriberri arteko tren zerbitzua bertan behera utzi behar izan dute, hiru zuhaitz katenaria gainera erori direlako eta trenbide sarearen zati hori tentsiorik gabe utzi dutelako.
Aemet Espainiako Meteorologia Agentziak ere alerta laranja ezarri du Nafarroa erdialdean eta Erriberan, 16:00etatik 23:00etara, prezipitazioengatik, eta abisu horia Foru Erkidegoko isurialde atlantikoan eta Pirinioetan, prezipitazio handiak espero baitituzte denbora tarte berean.
Hori dela eta, Nafarroako Gobernuak erabaki du larrialdi aurreko egoera ezartzea. Gainera, Ebroko Ur Konfederazioak ohartarazi du litekeena dela ibaien ur-emaria oso denbora gutxian asko haztea.
Oñatin (Gipuzkoa), ekaitz bortitzak kalteak eragin ditu Unibertsitatearen aurrealdean.
BBK Live jaialdian ere gogor jo zuen ekaitzak, eta Amaia eta Rayeren kontzertuak zapuztu
Ekaitzak Bilbao BBK Live jaialdiaren gaueko programazioari ere eragin dio. Bart gauean, Amaiaren emanaldia gelditu behar izan zuten, eta hainbat arazo izan ziren gaueko kontzertu nagusian, Raye britainiarraren kontzertuan.
Euri jasak, haizearekin, tximistekin eta trumoiekin batera, Amaiaren emanaldia gelditzera behartu zuen, hasi eta 20 minutura, eta Rayeren kontzertuaren hasiera atzeratu zuen. Gainera, zenbait minutuz eten behar izan zuen emanaldia, arazo teknikoak zirela eta.
Gutxienez bost hegaldi bertan behera, Loiun
AENAk jakitera eman duenez, Vueling konpainiak bertan behera utzi ditu ostiral arratsaldean Bilboko aireportuan lurreratu behar ziren bost hegaldi. Ekaitz elektrikoak izateko arriskuaren aurrean hartu dute hegaldi horiek bertan behera uzteko erabakia.
Bost hegaldi horiek Alacant, Bartzelona, Malaga, Eivissa eta Londrestik zetozen.
Hegazkinak Bilbora heldu ez direnez, bertan behera geratu dira Loiutik Alacant, Bartzelona, Malaga, Eivissa eta Londresera hegazkin horiek egin behar zituzten bueltako bidaiak ere.
Bestalde, Meteofrancek abisu horia iragarri du ekaitzengatik Iparraldea barne hartzen duen Pirinio Atlantikoetan.
Ekaitz-giroa nagusituko da larunbatean. Prezipitazioak nonahi izan ahalko dira, eta probabilitate handiagoa izango da goizaldean eta eguneko lehen orduetan. Goizak atsedenerako tartetxo bat eman diezagukeen arren, zaparrada batzuk botako ditu han-hemenka, eta arratsaldean ekaitzak joko du berriro, indar txikiagoarekin, ekialdean gogorrago. Tenperatura maximoak apur bat jaitsiko dira, eta beroa eramangarriagoa izango da. Haize-bolada gogorrak izan daitezke ekaitz-guneetan.
Larunbatera begira, Euskalmetek eta Aemetek abisu horia ezarri dute Araban eta Nafarroa osoan, isurialde atlantikoan salbu.
Eguraldiari buruzko albiste gehiago
Eguraldi eguzkitsua, oro har, eta ekaitz eta zaparrada arriskua hegoaldean
Datorren astean, eguraldi eguzkitsua izango da, tenperatura epelarekin, eta hurrengo asteburuari begira, tenperatura igoera eta zerua are gehiago argitzea espero da.
20 gradutik gorako tenperaturak eta giro eguzkitsua asteburu osoan
Hegoaldeko haizea ibiliko da, eta tenperatura maximoak 25 gradu ingurukoak izango dira. Badirudi datorren astean ere ildo horri helduko diola eguraldiak.
Eguzkiak aginduko du hurrengo ordu eta egunetan
Astelehenean eta asteartean maximoak 20 gradutik gorakoak izango dira, nahiz eta goizaldean giroa nabarmen freskatuko den.
Nabarmen freskatuko du igandean
Tenperatura larunbatekoa baino askoz freskoagoa izango da, eta euria egingo du han-hemen.
Hodeiak gaur eta bihar, euria igandetik aurrera
Ostiralean eta larunbatean hodeiak izango dira, baina ez du euri askorik egingo; igandean, berriz, prezipitazio txikia egongo da isurialde atlantikoan, eta tenperaturak behera egingo du. Astelehenean, ezegonkortasunak jarraituko du, zerua hodeitsu egongo baita eta balioak aurreko egunetako oso antzekoak izango baitira.
Abisu horia Nafarroan, ekaitzengatik eta euriagatik
Horrez gain, Ebroko Konfederazio Hidrografikoak ohartarazi du igande honetan ur-goraldiak izan daitezkeela ubide txikietan eta amildegietan.
Eguzkia eta tenperaturak gora gaur, kontraste handiko asteburua baino lehen
Ostiral eguzkitsua izango dugu, behe-lainoarekin barnealdeko zenbait puntutan, eta maximoak apur bat igoko dira. Larunbata epelagoa eta atseginagoa izango da, baina igandean hodeiak, iparraldeko haizea eta euri txikia espero dira.
Abisu horia arratsaldetik aurrera, prezipitazio handiak botako ditu eta
Aurreikuspenen arabera, ordubetean metro koadroko 15 litro baino gehiago pilatuko dira isurialde kantauriarrean eta, bereziki, kostaldean.
Giro grisa, freskoa eta bustia udari agur esateko
Zaparrada ugari espero dira, eta askotan mardulak izango dira, isurialde atlantikoan gehienbat. Tenperaturari dagokionez, maximoak ez dira 18 ºC-tik gora pasatuko.
1970etik hirugarren udarik beroena amaitu da Euskadin
Ekainean, uztailean eta abuztuan hiru bero-bolada izan dira: lehena ekainaren 18tik 21era, bigarrena ekainaren 27tik uztailaren 1era eta hirugarrena abuztuaren 10etik 17ra.