120 km/h-tik gorako ufadak egon daitezkeela eta, alerta laranja iganderako Bizkaiko eta Gipuzkoako haizeguneetan
Nabigaziorako itsasaldeko arriskuagatik ere alerta laranja indarrean izango da. Zarautzen ez da Sagardo Egunik izango eta Donostian parkeak itxi dituzte. Getxon, krisi mahaia bilduko da igande honetan.
Olatuek gogor astindu dute gaur Donostian Haizearen Orrazia. Argazkia: Lazaro Gonzalez
Eusko Jaurlaritzako Segurtasun Sailak eguneratu egin du datozen egunetarako muturreko fenomenoen iragarpena, eta horiek ikusita, alerta laranja ezarriko du igandean Bizkaiko eta Gipuzkoako haizeguneetan 120 km/h baino gehiagoko boladak espero baitira. Haize gogorraz gain, Ingrid ekaitzak itsaso zakarra eragingo du, eta, hori dela eta, nabigaziorako alerta laranja ezarriko du biharko eta etzirako; izan ere, 5-6 metroko olatuak espero dira. Elur-arriskua dela eta, abisu horia egongo da indarrean EAEko barnealdean, baita olatuen inpaktuagatik kostaldean eta haizeagatik Araban.
Gaur, larunbatarekin, hiru abisu hori daude indarrean: bi, itsasaldeko arriskuagatik, eta bestea, elurragatik barnealdean. Gauerdiarekin batera aktibatu da itsasaldeko arriskuagatik ezarritako abisu horia (nabigaziorako, lehenengo bi milietan), eta egun osoan egongo da indarrean. 3-3,5 metroko olatuak izango dira, eta baita hortik gorakoak ere egunaren erdiko orduetan. Bestalde, 20:00ak eta 21:00ak bitartean, itsasgorarekin batera, olatuek kostaldean izan dezaketen inpaktua dela-eta, beste abisu hori bat egongo da aktibo. Elurragatik barnealdean ezarritako abisua 15:00etan sartuko da indarrean, gauerdira arte. Elur-kota 600-800 metro inguruan egongo da, eta azken orduetan, 900-1.000 metroan. Prezipitazio txiki-ertaina egingo du, sarriago eta ugariago isurialde atlantikoan. Trumoi-ekaitzak izan daitezke eta txingorra egin dezake, bereziki isurialde atlantikoan.
Igandean, okertzera egingo du aroak, eta bi alerta laranja ezarriko ditu Jaurlaritzak: haize zakarragatik bata eta itsasaldeko arriskuagatik bestea. Euskalmeten iragarpenaren arabera, eguerditik eguna amaitu arte, mendebaldeko haizeak gogor joko du eta ufadek 120 km/h-ko abiadura gaindi dezakete Bizkaiko eta Gipuzkoako haizeguneetan, bereziki kostaldean. Itsasoan ez da giro izango: lehen bi milietan alerta laranja egongo da indarrean 15:00etatik 24:00etara nabigaziorako. Olatuen altuera adierazgarria 5 metrokoa izango da arratsaldean, eta 6 metrora irits daiteke azken orduetan.
Elurragatik barnealdean (12:00-24:00), elur-kota 900-1.000 metrora jaitsiko baita, nabigaziorako itsasaldean (00:00-15:00) eta inpaktuagatik kostaldean (08:00-10:00 eta 20:00-22:00) itsasgora denean. Gainera, beste hiru jarriko dituzte indarrean: Arabako haizeguneetan haizeagatik, eta haizeguneak ez direnetan Bizkaian eta Gipuzkoan (12:00-24:00), 100 km/h-ko boladengatik, eta beste bat olatuengatik (15:00-24:00). Euskalmeten arabera, olatuen ezaugarrien eta mendebal-osagaiko haize zakarraren ondorioz, pasealeku eta malekoietan zipriztinak eta olatu-zaparrak izan daitezke.
Donostian, parkeak itxita
Donostiako parkeak eta Polloeko hilerria itxiko dituzte igande honetan, haize zakarra dela eta. Zehazki, sarrera debekatuta egongo da honako toki hauetan: Aieteko parkean (Kultur Etxea izan ezik), Cristina Enean, Miramarren, Urgullen, Serafin Barojan, Oroimenaren Parkean eta Polloen.
Gipuzkoan baita ere, ez da Sagardo Egunik izango Zarautzen, eta datorren astean iragarriko dute data berria.
Egoeraren jarraipen berezia Getxon
Testuinguru horretan, egoeraren jarraipen berezia egiteko krisi-mahaia batuko dute igande honetan Getxon (Bizkaia), eta zuhaitzak dauden eremuetatik ez ibiltzeko gomendatu dute; bereziki Zugatzarte pasealekutik eta Maximo Agirre kaletik, zuhaitz handiak daudelako. Aurreikuspenen arabera, Ereagako igogailuaren ohiko funtzionamenduan ere eragina izan lezake haizeak, eta zerbitzuan etenaldiak egon litezke, segurtasun arrazoiengatik.
Eguraldi kaxkarra astelehenerako
Itsasaldeko arriskuagatik nabigaziorako ezarritako alerta laranjak indarrean jarraituko du astelehenean (00:00-06:00), 5-6 metroko olatuak espero baitira. Haizeagatik Bizkaiko eta Gipuzkoako haizeguneetan abisu horia egongo da aktibo gauerditik 03:00ak arte, ufadek 100 km/h-ko abiadura gaindi dezaketelako. Olatuen zipriztinengatik ezarritako abisu horia ere gauerditik 06:00ak arte egongo da indarrean. Nabigazioari ezarritako alerta laranja abisu hori izango da 06:00etatik eguerdira arte. Olatuen altuera adierazgarria 3,5 metrokoa izango da.
Zure interesekoa izan daiteke
Euria eta ekaitzak, astea hasteko
Iparraldeko haizea ibiliko da, eta, ondorioz, tenperatura maximoek nekez gaindituko dituzte 15 graduak.
Abisu horiak Euskal Herri osoan zaparrada trumoitsuengatik
Zaparradak espero dira, batez ere arratsaldetik aurrera, toki batzuetan haize bolada gogorrekin eta kazkabarrarekin.
Goiz argitsua eta arratsalde euritsua maiatza abiatzeko
Abisu horia egongo da indarrean ostiral arratsaldeko 17:00etatik 22:00etara, prezipitazio handiengatik, baita bihar 14:00etatik 22:00etara ere. Ezegonkortasuna izango da nagusi maiatzeko lehen asteburuan, eguzki tarteak eta zaparradak nahasiko dira, eta haizea aldakor ibiliko da. Tenperaturek, hala ere, epel jarraituko dute.
Abisu horia Araban euriteengatik, San Prudentzio bezperako Erretretan
Segurtasun Sailak 15:00etatik 21:00etara aktibatu du abisua, Gasteizko jaietako ekitaldien hasierarekin bat eginez. Euskalmetek ordubetean metro koadroko 15 litro baino gehiago bota ditzakeela aurreikusi du.
Hodeitsu bukatuko da apirila, zaparradekin tarteka eta 20 gradu inguruko tenperaturekin
Goibel itxura dakar astelehenak, baita astearteak ere. Halere, oso aldakor dator eguraldia.
Zergatik da garrantzitsua zientzialarientzat eklipseak aztertzea?
Eguzki eklipse osoak ez dira asko izaten. Abuztuaren 12koa igaro ondoren, hurrengoa 2180. urtean izango da. Hori dela eta, zientzialarientzat une hori oso garrantzitsua izan ohi da. Ateratako irudiekin hainbat ikerketa egiten dituzte urteetan zehar. Horren adibide, 1860an, Erresuma Batuko astronomo bat Euskal Herrira etorri zen, orduan izan zen eklipse bati argazkiak ateratzeko.
Udaberriko eguraldia astebururako, baina hodeiak ugaritu eta tenperaturak jaitsi egingo dira
Larunbatean, maximoak 20º ingurukoak izango dira Bilbon eta Donostian, eta 23º ingurukoak Iruñean eta Gasteizen.
Udaberriko giroa nagusi izango da astearen amaieran, baina euria egingo du, eta maximoek, behera
Ostegun honetan, maximoak 30°C ingurukoak izango dira, eta ostiralean, 23°C ingurukoak.
Eguraldi egonkorra eta tenperatura epelak, 25 gradura arteko maximoekin
Ipar partean epelenak 8-10 gradu artean jaitsiko dira, 20-23 graduraino.
Eguzki goria goizean eta trumoi-zaparrada arratsaldean, euriagatiko abisu hori eta guzti
Egunaren lehen zatian tenperatura maximoak 30 graduraino iritsiko dira, hego haizeak bultzatuta. Hala ere, arratsaldetik aurrera bero-hodeiak garatuko dira eta litekeena da, tokian-tokian, ekaitza lehertu eta zaparrada batzuk botatzea. Segurtasun Sailak euriagatiko abisu horia ezarriko du 18:00etan, zaparrada mardulengatik, ordubetean 15 litrotik gora pilatuko direla aurreikusi baita.