Alerta laranja igandean Hego Euskal Herri osoan muturreko beroagatik, 40 gradurainoko maximoekin

Beroak zakartzen jarraituko du datozen egunetan Hego Euskal Herrian, eta astebururako aurreikusitako abisu meteorologikoak maila horitik laranjara igaro dira, iragarpenak okerrera egin duelako.

Eusko Jaurlaritzako Larrialdiei Aurre Egiteko eta Meteorologiako Zuzendaritzak emandako azken abisuaren arabera, gaur abisu horia egongo da aktibo  16:00ak eta 22:00ak bitartean, prezipitazio handiak espero direlako. Metro koadroko 15 litro baino gehiago bota ditzake ordubetean, eta trumoi zaparrada gogorrak botako ditu, bereziki Araban eta Bizkaian. Horrez gain, txingorra eta 100 km/h-ko haize boladak ere bota ditzake.

Gainera, abisu horiak indarrean jarraituko du egun osoan Araban baso-suteak izateko arriskuagatik, tenperatura altuak eta hegoaldeko haizea direla eta.

Larunbatean, abisu horiak jarraitu egingo du. Batetik, tenperatura altu iraunkorrak izango dira trantsizio-gunean eta Ebroko ibarrean: termometroak 33 eta 34 gradu artean ibiliko dira. Bestetik, abisu horia izango da aktibo 18:00etatik 24:00etara prezipitazio handiak eta ekaitzak, 4 zentimetroko txingorra eta haize bolada bortitzak izan daitezkeelako.

Era berean, Araban abisu horia izango da berriro egun osoan, baso-suteak izateko arriskuagatik.

Euskalmetek alerta laranja ezarri du 12:00etatik 20:00etara muturreko tenperatura altuak izango direlako. Maximoak 35 gradu inguruan geratuko dira kostaldean, 39 gradu inguruan barnealdean eta 37 inguruan trantsizio-eremuan eta Ebroren ibarrean.

Abisu horrez gain, alerta laranja ezarri dute Araban igande osoan baso-suteak izateko arriskuagatik. Tenperatura oso altuak, ingurune sikua eta hegoaldeko haizea izango dira protagonistak.

Azken abisuak baieztatu egin du Euskalmetek asteburu honetarako aurreratutako aurreikuspenek okerrera egingo dutela. Igandean, uda 10:24an ofizialki iristearekin batera, egunik beroena izango da, eta Hego Euskal Herriko hainbat tokitan 40 graduko tenperaturak izan litezke.

Antzeko tenperatura altuak espero dira Nafarroan ere, eta alerta laranja ezarri dute 12:00etatik 20:00etara. 

Nafarroan ere tenperatura oso altuak espero dira, eta alerta laranja igandean sartuko da indarrean, 12:00etatik 20:00etara.

Nafarroako Gobernuak gogorarazi du arreta handiz ibili behar dela asteburuan, eta suteak sor ditzaketen jarduerak saihestu behar direla.

Estatuko Meteorologia Agentziaren (AEMET) aurreikuspenen arabera, sute arriskua "oso handia" edo "muturrekoa" izango da ia Nafarroako lurralde osoan. Horrela, aste hasierako joerak jarraitzen du, eta datozen egunetan ere joera horri eutsiko dio, aurreikuspenen arabera.

Asteburuan zehar, tenperatura maximoek gora egingo dute, igandean 40 gradutik gora izango dira, eta asteartean 42 graduren bueltan egon daitezke Nafarroako eremu zabaletan.

Halaber, gaur, ostirala, eta bihar, larunbata, haize gogorra eta ekaitzak espero dira. Hori dela eta, lursailetan egiten diren jardueretan kontu handiz ibiltzeko gomendatu dute, eta indarrean dagoen araudia betetzeko.

Foru Komunitateko hegoaldeko bi herenetan ez da prezipitazio esanguratsurik erregistratu azken 30 egunetan, eta horrek, tenperatura altuekin eta gaueko hezetasuna ez berreskuratzearekin batera, landaredia erabat siku egotea eragin du, eta su hartzeko arriskua handia da.

Ildo horretan, zereal uztan eta hezetasun gutxiko beste labore batzuetan arreta handiz jarduteko gomendatu dute, baita landa-eremuko beste jarduera profesional batzuetan ere.

Egoera meteorologikoa zaila denez, lan horiek 14:00etatik aurrera ez egiteko gomendatu dute.