Berbagailua eta Atartea guneak estreinatuko ditu Durangoko Azokak, podcasten eta Arte Ederren plazak
60. edizioan, 285 erakusmahaitan paratutako 1.000 nobedadetik gora, inoiz baino gehiago, eta 273 ekitaldi eskainiko ditu DA Kulturaren Jaialdiak. Egitarau osoa iragarri dute, gaur, Landakon.
Durangoko Azokak 60 urte beteko ditu, baina aurrera begira jarraitzen du, nola ez, gaur, asteazkenarekin, abenduaren 5etik 8ra Kulturaren Jaialdiak eskainiko dituen jardueren egitarauaren aurkezpenean, antolatzaileek azaldu dutenez: “Atzera begirako nostalgian erori ordez, harro aldarrikatu nahi dugu gaur Durangoko Azokak izandako bilakaera eta pozik heltzen diogu aurrean dugun erronkari”, adierazi du Beñat Gaztelurrutia Azokaren koordinatzaileak.
Guztira, Landako gunean, 175 saltzailek 285 erakusmahai jarriko dituzte, 1.026 kultur nobedade egongo dira salgai: 694 liburu, 163 musika ekoizpen, 30 aldizkari eta bestelako 139 ekoizpen (fanzineak, audioliburuak, podcastak…).
Gainera, 273 ekitaldi programatu dira sortze lan horien inguruan, Durangoko Azokaren espazio guztietan, tartean, bi gune berrietan: Berbagailua (Podcasten Plaza) eta Atartea (Arte Ederren Plaza).
Gainera, gaueko egitaraua berreskuratuko du Azokak. Landakoko saltokia itxi eta gero, gauetako kontzertuak izango dira: hilaren 5ean Lukiek eta Ezezez, eta 6an Mirua eta Naxker. Gainera, 6an Behe Bandakoen errezitaldia eta bostOK konpainiaren emanaldi bat ere egongo da iluntzean; eta abenduaren 7an Formol laborategiaren ikuskizuna, Bittor Kapanaga kulturgilea omentzeko ekitaldia eta Gaua filmaren emanaldia, Paul Urkijo bertan dela.
"Gaua"
“Gaua”n ez galtzeko koordenadak: pelikularen materiala primizian
Paul Urkijoren hirugarren film luzea ostiralean, hilak 14, iritsiko da zinema-aretoetara. Lehenago, Urkijok berak pelikularen gako batzuk eman dizkigu primizian, gauean murgiltzeko mapa modura erabil ditzagun.
Egitarau osoa durangokoazoka.eus webean kontsultatu ahalko da.
Guneetako arduradunek programazioko hainbat ekitaldi azpimarratu dituzte, hala nola Joxe Azurmendi omentzeko ekitaldia (abenduak 8an), Miranderen inguruko mahaingurua Talaian; Azokan aurkeztuko diren lanak ilustratu dituzten 20 egileren erakusketa eta iazko Sormen Beka irabazi zuen Irati Bazetaren Harien isla erakusketa Atartean; 49 liburu aurkezpen eta 34 kontzertu Ahotsenean; eta Jone, batzuetan eta Gaua film luzeen emanaldiak eta Piztiak telesailaren estreinaldia Irudienean; azkenik, Szenatokia arte eszenikoen gunean bederatzi konpainia arituko dira: egunero hiru taldek parte hartuko dute, bina emanaldirekin.
Gainera, abenduaren 7an, igandearekin, Palestinaren aurkako genozidioa salatzeko “geldialdia eta elkarretaratze kulturala” egingo dute, 14:00etan.
Abenduaren 5ean, ateak zabaltzearekin batera, Ikasle Goiza izango da Durangon, baina Azoka zabalik egongo da bisitari guztientzat, ohiko ordutegian (10:30 – 20:00). Azken egunean, baina, 18:00etan itxiko da, bi ordu lehenago.
Bukatzeko, bisitariei garraio publikoa erabiltzea gomendatu diete, eta autoz doazenentzat autobus zerbitzua egongo da abenduaren 6tik 8ra, Iurretako autobide irteeratik Landakora.
Zure interesekoa izan daiteke
Gatiburen azken agurra, audientzian lider ETB1en
Musikarik, dantzarik eta festa girorik ez zen falta izan atzo bi ordu eta erdiz BECen. Talde bizkaitarra arrakastara eraman zuen 'Musturrek sartunde' kantuarekin amaitu zen askoren oroimenean iltzatuta geratu den kontzertua.
Milaka pertsonak azken agurra eman diote Robe Iniestari, Extremoduroko abeslariari, Plasencian
Ilara luzeak sortu dira Plasenciako kongresu jauregian, jarraitzaile asko bertaratu baitira musikariari agur esatera. Aurrerantzean, Robe Iniesta izena izango du eraikin horrek.
Urrezko domina eman dio Gipuzkoako Foru Aldundiak Lourdes Iriondo kantariari
Hilondoko aitortza egin dio Urnietako kantari, idazle eta irakasleari eta bere ahizpek jaso dute Foru Aldundiak emandako oroigarria. Ekitaldia omenaldi hunkigarri bilakatu da. Senide eta familiako kideekin batera, eta euskal kulturgintzaren ordezkaritza zabala bildu da.
Balenciaga museoa “josten duten eskuei” begira
Getariako Balenciaga Museoko Igor Uriak hamar urte eman ditu Cristobal Balenciaga jostun handiaren tailerretan lan egin zuten emakumeen lekukotzak eta objektuak biltzen: irudiak, dokumentuak, lanabesak... Paris, Madril, Bartzelona eta Donostian, 2.000 enplegatu izatera iritsi ziren, eta horietako batzuk Getariako museoan batu dira gaur.
Gaztelurrutia: “Bisitari fidelak edukitzea eta bi heren 45 urtez azpikoak izatea dira arrakastaren gakoetako bi”
2025eko Durangoko Azoka bukatu berritan, ETBri emandako lehen balorazioan pozik agertu da Beñat Gaztelurrutia Gerediaga Elkarteko kudeatzeailea. Jendetza ibili dela nabarmendu du, baina erosoa izan dela bai sartzea baita bertan zehar ibiltzea ere. 2026ko Azokak 5 egun izango dituela aurreratu du, eta etorkizuneko erroka kulturaren jaialdi gisa sendotzea izango dela esan du.
60 urteko ibilbidea “borobildu” du Durangoko Azokaren aurtengo edizioak
Lau eguneko topagune oparoa amaitutzat emateko, antolatzaileek aurtengo Azokaren arrakasta nabarmendu dute, baita egitasmoak urte osoan euskal kulturan duen garrantzia ere.
Gazaren aurkako genozidioa, oso presente Durangoko Azokako nobedadeetan
Idazle asko beren nobedadeak aurkezten ari dira egunotan euskal kulturaren plazan, eta horietako batzuek palestinar herriaren aurkako genozidioa jorratu dute, Ekialde Hurbilean gertatzen ari dena azaltzeko asmoz.
Zuloaren silueta hitzez marrazten
Harkaitz Cano eta Eider Rodriguez idazleek “Silueta” eta “Dena zulo bera zen” liburuak aurkeztu dituzte Durangoko Azokaren hirugarren egunean, hutsuneak mamitzeko bi ariketa literario zeharo ezberdin.
Israel Palestinan egiten ari den genozidioaren aurkako geldiunea egin dute Durangoko Azokan
Bisitari, sortzaile eta antolatzaile ugarik bat egin dute protestarekin, Israelgo Estatua Palestinan egiten ari den genozidioa salatzeko eta elkartasun mezua zabaltzeko.
Durangoko Azokak geldialdia egin du genozidioa salatzeko
Palestinako genozidioa salatzeko geldialdia egin du Durangoko Azokak. Kultura erdigunean jarri eta mugaz gaindiko elkartasun mezua zabaldu dute ehunka kulturazalek Landako Plazan egin duten ekitaldian.