Tarsila do Amaral (Brasil) eta Helen Frankenthaler (AEB) artisten lanak, Guggenheimen izango dira 2025ean

Tarsila do Amaral brasildarrak irekiko du Guggenheim Museoaren erakusketa-egutegia 2025ean. Era berean, urtean zehar, Helen Frankenthaler margolari espresionista abstraktuaren lanak hartuko ditu Bilboko pinakotekak, beste erakusketa batzuen artean.

Guggenheim Bilbao Museoaren Fundazioaren Patronatuak datorren urterako erakusketen egutegia onartu du, eta lehenengoa otsailaren erdialdean inauguratuko da. 20ko hamarkadatik 60ko hamarkadara bitarteko ekoizpen emankorrari buruzko atzera begirakoa izango da, Tarsila do Amaral (1886-1973) da Brasilgo mugimendu modernistako margolari adierazgarrienarena, hain zuzen.

Otsailean ere, "Budapesteko paper gaineko maisulanak" inauguratuko da, eta horretan Hungariako hiriburuko Arte Ederren Museoko bildumatik datozen zazpi mendeko marrazki eta grabatuen aukeraketaz gozatu ahal izango da.

Udaberrian, museorako propio sortutako artista garaikideen proiektuei buruzko ziklo berri bat hasiko da. Lehenengoan, Refik Anadol bideoartista izango da protagonista, eta udazkenean, Mark Leckeyrekin jarraituko du, soinua, eskultura eta performancea uztartzen dituen lanari buruzko erakusketa batekin.

Helen Frankenthaler eta Barbara Kruger

Apirilean, "Helen Frankenthaler. Araurik gabeko pintura" inauguratuko dute Bilbon. Erakusketa horretan, autore estatubatuarrek (1930-2011) 1953 eta 2002 artean egindako zenbait lan ikusi ahal izango dira, eta, horri esker, emakumeak pinturari heltzeko erabili zuen ikuspegi iraultzailea aztertu ahal izango da.

Ekainean, Barbara Kruger artista estatubatuarraren ekoizpen berriari buruzko erakusketa izango da museoan, bisitariak testuez betetako inguruneetan murgilduko dituzten instalazioekin.

Udazkenean, Maria Helena Vieira da Silvaren forma abstraktuak eta ilusio optikoak zabalduko dira pinakotekan, eta abenduan, berriz, "Lurraren Arteak" aurkeztuko dute, museoaren ingurumen-iraunkortasunarekiko konpromisoaren barruan.

Film & Video zikloaren barruan, Guggenheimek Vito Acconcik bideogintzan eta performance lanetan egindako ibilbidea erakutsiko du.

Obra berriak

Museoak artelan berriak eskuratzea erabaki du, horien artean, Helen Frankenthalerren bi margolan. "Requiem" (1992) eta "Santorini" (1965) dira, azken hori Helen Frankenthaler Foundationek egindako dohaintza.

Bestalde, duela gutxi June Crespori eskainitako erakusketa zela eta, euskal eskultoreak pieza multzo bat propio sortu zuen horretarako, eta horietatik hiru sartuko dira Bilboko museoaren funtsetan.

Era berean, Guggenheimek Metahaven bikote nederlandarraren "Kaosaren Teoria" bideo-instalazioak jasoko ditu; mundu hiperkonektatu bateko giza harremanen konplexutasunari buruzko ikus-entzunezko poema da hori. Horrekin batera, Anthony McCallen "Segundoaren frakzioa (Ispilua) IV", non ispiluen eta pantailen gaineko proiekzioek eta efektuek argi-marrazkiak sortzen dituzten.

Museoak aurten hartu dituen aldi baterako erakusketak direla eta, bilduman sartuko dira ere Yoshitomo Nararen "Gauerdiko malkoak" lana, eta Martha Jungwirthen "Autoerretratua", 1982-84ko lan goiztiarra, eta Australidelfos serieko "Titulurik gabea" monumentala, artistak 2019an Australia suntsitu zuten suteek eragindako hondamendi naturalari erantzuteko sortu zuena.

Erosketa horiei Rodenstock Bildumako 50 pieza ingururen epe luzeko mailegua gehitu behar zaie. 2025eko udazkenean, lan horien sorta hautatua aurkeztuko dute museoan, besteak beste, Lucio Fontana, Yves Klein, Agnes Martin, Cy Twombly eta Jeff Koonsen lanak, multzo gisa jendaurrean lehen aldiz erakutsiko direnak.