San Telmo Museoan izango dira berriro Hamabostaldiko ganbera-musika emanaldiak

Iaz bezala, aurten ere ganbera-musika zikloa egongo da Donostiako Musika Hamabostaldian, eta hiru kontzertu izango ditu, abuztuko ostegunetan, San Telmo Museoko klaustroan.

Akustika bikaina duen aretoak 'Ostegun musikalak San Telmon' zikloa hartuko du, eta "Artea eta mitoa. Prodoko jainkoak" erakusketarekin (Zurbaran, Ribera, Rubens, Houasse, etab.) zerikusi zuzena izango dute kontzertuek.

Hori horrela, hiru emanaldietan sortzaile handien musikaz gozatu ahal izango da: Gluck, Haydn, Turina, Ravel… Guztiek gauza bat dute komunean, mitologian aurkitu zutela piezak konposatzeko inspirazioa, Hamabostaldiak azaldu duenez.

Zikloa bihar hasiko da The Brahms Projecten kontzertuarekin. Musika germaniarrarekin itzuliko da taldea 'Ostegun musikalak San Telmon' ziklora.

Bigarren ostegunean, 16an, bi bakarlari handiren txanda izango da: Lina Tur Bonet Ibizako biolin-jotzailea eta Judich Jauregi pianista donostiarra.

Azken ostegunean, 23an, Clara Moruiz Britainia Handian bizi den soprano donostiarra izango da protagonista, eta Joseph Middleton pianista famatua izango du aldamenean.