PSNk Barcina 'botako' du, esku-sartzeak frogatuta dimititzen ez badu

PSN-PSOEk Yolanda Barcina Nafarroako presidentea "botako" du, Parlamentuko batzordeak Foruko Ogasunean "esku-sartzeak" izan zirela egiaztatzen badu, eta, hori hala izanda hauteskundeak aurreratzen ez baditu.

Idoia Nieves Nafarroako Ogasun zuzendari ohiak atzo Parlamentuan esan zuen Lourdes Goicoechea Ekonomia kontseilariaren "esku-sartze" saiakeren ostean dimititu zuela. Besteak beste, bere bulegoko bezero partikularrei datu fiskal erlatiboak ematea leporatu zioni.

Nievesen adierazpenek asteazken honetan Nafarroako Parlamentuak aho batez ikerketa batzorde bat sortzea eragin dute.

PSNk arratsaldean hamabost eguneko epea eman dio batzorde horri egindako salaketak egia diren egiaztatzeko, eta sozialistentzat "itxura guztiak" dituela adierazi dute.

Nievesek esandakoa egia dela frogatuz gero, Barcinari dimititzea eskatu diote eta hauteskundeak aurreratzea, hori egin ezean "botatzeko" zentsura-mozioa aurkeztuko dutelako.

''Ahultasun instituzionala''

Lehenengo aldia litzateke PSNk baliabide hori erabiltzen duena, baina, Jimenezen hitzetan, Barcinak “Nafarroa ahultasun instituzionaleko egoeran jarri du, eta horrek erkidegoaren etorkizuna zalantzan jartzen du”.

Ekimen honen bidez, sozialistek trantsizio-gobernua ahalbidetu nahi dute. Roberto Jimenezek oposizioko alderdi nagusiko lider izateko aukera izango du, eta horren helburua "ikuskatzea, alfonbrak altxatzea, ateak eta leihoak irekitzea, eta foruko diru-kutxetan egon daitezkeen trapu zikin guztiak astintzea" izango da.

Aldi baterako Gobernua izango litzatekeela nabarmendu du, horretarako "egokienak diren pertsonek" osatuta, Barcinak "zapuztutako sinesgarritasuna" berreskuratzeko. Behin "kontagailua zeroan jarrita", aurreratutako hauteskundeak deitzeko, Europako hauteskundeekin  batera, datorren maiatzean.

Halere, Jimenezek ez du zehaztu Gobernu berrian oposizioko gainerako alderdiak egongo ziren, ezta zentsura-mozioa PSNk bakarrik sinatuko duen edota beste alderdiren  batekin (Bilduk, Aralar-Nabai, Izquierda-Ezkerra eta Geroa Bai). Aurkeztearen alde egin dute gainerako alderdiek ere.

Alderdien erreakzioak

EH Bildu osatzen duten Parlamentuko bi alderdiek (BIldu eta Aralar-NaBai) beste indar politikoekin hitz egingo dutela iragarri dute "beharrezko pausoak emateko foru-hauteskundeak maiatzaren 25ean izan daitezen, Europakoekin batera".

Geroa Baik eskakizun bat egin dio PSNri Ogasunean ustez egindako "esku-sartzeak" egiaztatuta Yolanda Barcina presidenteak dimititu ezean iragarri duen zentsura-mozioa "azkar" aurkezteko, hauteskundeak Europako hauteskundeekin batera egin daitezen.

PSNren iragarpenaren ondoren, UPN gaur gauean bertan ari da estrategia aztertzen. Edonola ere, ez dago aurreikusita adierazpenik egitea

Kontuzek Goicoechearen aurkako salaketa jarriko du

Nafarroako Kontuz Erabiltzaileen, Kontsumitzaileen eta Zergadunen Elkarteak iragarri duenez, ostegunean Auzitegi Gorenean, Madrilen, Lourdes Goicoechea Ekonomia kontseilariaren aurkako salaketa bat aurkeztuko du, Ogasunean informazio konfidentzialaren ustezko erabileragatik.

Kontuzek ohar batean azaldu duenez, Auzitegi Gorenean aurkeztuko duen salaketa presidenteordea sekretuak ezagutzera emateko delituagatik, desleialtasuna dokumentuen zaintzangatik, trafiko-influentziagatik, funtzionarioei eta agintariei debekatutako negoziazioagatik eta prebarikazioagatik jarriko da.