Masek aurrera jarraituko du kontsulta egiteko prozesuarekin

Artur Mas Generalitatearen presidenteak iragarri du kontsulta egiteko prozesuarekin jarraituko duela, nahiz eta Auzitegi Konstituzionalak Kataluniako Parlamentuak 2013ko urtarrilean onartu zuen Subiranotasun Adierazpena atzera bota, eta posible ikusten du, borondate politikoarekin, legea errespetatuz "oztopoak" gainditzea.

"Bide honetan aurkitzen ditugun oztopoen aurrean, bilatuko dugu irtenbideren bat saihesteko", adierazi du Masek Kataluniako Gobernuaren kontrol-saioan, Parlamentuan.

Subiranotasun Adierazpena atzera bota ostean, badago tartea oraindik Masen prozesua bideratzeko; horregatik, kontsultak deitzeko eta antolatzeko eskumena Kataluniako Parlamentuaren esku uztearen alde bozkatzeko eskatu dio Masek Diputatuen Kongresuari.

Masek Konstituzionalaren ebazpenaren azken puntua izan du hizpide, Kataluniari erabakitzeko eskubidea aitortzen baitzion, legearen barruan eginez gero. Presidenteak puntu hori aintzat hartuta erabaki omen du kontsultarako prozesuarekin aurrera jarraitzea.

Kataluniako presidentearentzat "larriena" ez da ebazpenaren edukia bera, ERCk eta ICVk ere kritikatu dutena, baizik eta "politikoa" den adierazpen baten inguruan ebazpena eman izana.

Mas oso kritiko agertu da Konstituzionalarekin, eta zalantzan jarri du herritarren zerbitzura dagoen auzitegi bat ote den: "Zer egiten du Auzitegi Konstituzionalak adierazpen politiko bat bertan behera uzten? Denon zerbitzura dagoen epaitegia da, eta batzuk zalantzan jartzen dugu eta Estatuko herritar guztien epaitegia den, batzuk uste baitugu ez dela horrela".

Baina Masek, PSCren, PPCren eta Ciutadansen norabide aldaketa eskaerari entzungor eginda, subiranotasun prozesuarekin aurrera jarraituko duela hitzeman du, "erronka demokratiko handia" delako. Horren harira, erantzunak "bide politikotik ez ebazpenetatik" etorri behar dela azpimarratu du, eta Adolfo Suarezi egin dio erreferentzia.

Auzitegi Konstituzionalak aho batez errefusatu du Kataluniako Parlamentuak 2013ko urtarrilean onartutako subiranotasun-adierazpena. Bertan, "subjektu subirano juridikotzat eta politikotzat" jotzen zen Katalunia, eta Gobernuak kontra egin zuen. Halere, Kataluniaren erabakitze eskubidea onartzen du, hori legezkotasun konstituzionalaren barruan gauzatzen bada.

Atzo iragarri zuen Francesc Homs Kataluniako Generalitatearen Presidentetzako kontseilari eta bozeramaileak Auzitegi Konstituzionalaren ebazpenak ez duela subiranotasun prozesuaren bide-orria aldatuko.

Ebazpenak Kataluniako alderdien erreakzioak eragin zituen, eta nazionalistak izan ziren aurka agertu ziren bakarrak.