Rajoyk Masekin hitz egingo du eta asmoak zehazteko eskatu dio PSOEri

Mariano Rajoy Espainiako Gobernuko presidenteak Artur Mas Generalitateko presidentearekin eta Pedro Sanchez PSOEko idazkari nagusiarekin Kataluniaz hitz egiteko prest dagoela berretsi du, Espainiaren burujabetzaren kontrako jarrerarik erakusten ez duten bitartean. Gainera, esloganak albo batera uzteko eta Konstituzioa erreformatzeko dituen proposamenak zehazteko eskatu dio Sanchezi.

Horrela erantzun dio Rajoyk, Gobernuaren kontrol saioan, sozialisten idazkari nagusiari, azaroaren 9aren ondoren sorturiko egoeraren aurrean dituen aurreikuspenak azaltzeko eskatu dionean. Konstituzioaren erreforma negoziatzeko eskatu dio Sanchezek Rajoyri, eta arazo politiko horri bizkarra ematen jarraituz gero, berak arazoaren zati izaten amaituko duela ohartarazi dio.

Irekiko den garai berriaren aurrean, Espainiako Konstituzioa defendatzen jarraituko duela azpimarratu du Rajoyk, eta Masekin herritarrak kezkatzen dituzten gaiez mintzatzeko prest agertu da.

Espainiako Gobernuko presidenteak baieztatu du azaroaren 9ko parte-hartze prozesua dela-eta Fiskaltzak Masen inguruan erabakitzen duena errespetatuko duela, "erabakia bata edo bestea izan". "Errespetatu egingo dut Fiskaltzak autonomiaz erabakitzen duena, izan erabakia halakoa edo bestelakoa. Gobernuko presidente gisa dudan gutxieneko betebeharra da, eta mundu guztiak gauza bera egitea gustatuko litzaidake", adierazi du Rajoyk Diputatuen Kongresuko korridoreetan. Espainiako Gobernuak bere funtzioa bete du eta orain fiskalei dagokie Masen kontrako kereila aurkeztu ala ez erabakitzea, gaineratu du Rajoyk.

Ekonomiaren joera aldatzen ari dela adierazi du Rajoyk

Rajoyren esanetan, "muturreko egoera gainditu ostean joera aldaketa bat" izan da, eta orain "etorkizunari begira horri eustea izango da gakoa".

Joan Coscubiela Izquierda Plural taldeko diputatuak pobrezia eta desberdintasuna gutxitzeko zerbait egiteko asmoa duen galdetu dio Mariano Rajoyri gaur Diputatuen Kongresuan.

Legegintzaldiko helburua krisia gainditzea, haztea eta enplegua sortzea zirela berretsi du Rajoyk, eta urteetan atzeraldia eta langabeziaren gorakada izan ostean, egoera ekonomikoak "hobera" egin duela iritzi dio. "Hazten hasi gara, enplegua sortzen eta ongizatea hobetzen, eta horrek pobrezia eta desberdintasun gutxiago egotea dakar", gaineratu du.