'Sua piztea' eta 'fundamentalista' izatea leporatu diote Ciudadanosek, PPk eta PSCk

Ines Arrimadas Ciudadanoseko Kataluniako buruzagiaren iritziz, Quim Torra hautagaia "ez dator Gobernu bat zuzentzera, CDR bat -Errepublikaren Defentsarako Batzordea- zuzentzera baizik", "bere nazionalismo identitario baztertzailearekin" eta "Errepublika eraikitzeko helburuarekin". Hala, "sutara egur gehiago botatzera etorri zara" ihardetsi dio.

JxCatek Generalitateko presidente izateko aurkeztu duen hautagaiaren inbestidura saioa egiten ari dira gaur Kataluniako Parlamentuan, eta goizean Torrak hitz egin ostean, talde parlamentarioek hitz egin dute arratsaldean. Arrimadas gogor mintzatu da Torraren aurka bere hitzaldian. "Kataluniarrak berrasdiskidetzen hasteko eta Espainiarekin zubiak eraikitzeko prozesuarekin hasteko aukera galdu" dela esan du, baita Quim Torra "ezin izango dela inoiz kataluniar guztien presidente izan" ere.

Miquel Iceta PSCko burua ere antzera mintzatu da eta "tamalgarritzat" jo du Torrak errepublika kataluniarra eraikitzea eta prozesu konstituziogilea garatzea agindu izana. Hala, "autogobernuak arriskuan jarrai" dezakeela abisatu du, ez bada "aldebakarreko bidea alde batera uzten". "Iraganeko akatsetatik ikastera" dei egin du, eta prozesu konstituziogilearen inguruko batzordea egin zenean Auzitegi Konstituzionalak bertan behera utzi zuela gogorarazi du.

Quim Torrak profil "fundamentalista" duela ere esan du Miquel Icetak eta "onartezina" dela Torraren presidentzia "denboraldi baterako" izango dela eta "Puigdemontek zuzenduta" egongo dela esatea.

Xavier Garcia Albiol PPCko buruzagiak ohartarazpena egin dio Quim Torrari: "Gatazkarekin jarraitzeko asmoa baduzu, eta asmoetatik ekintzetara igarotzen bazara, demokraziak zure aurrekoekin egin bezala erantzungo dizu". Torraren hautagaitzarekin oso kezkatuta agertu da bere interbentzioan, "sua itzaltzeko gasolina botatzea bezalako diskurtsoa" baitu, eta bere ezaugarri nagusia "erradikalitatea" dela gaineratu du.

Junts per Catalunyako ordezkariari esan dio argitzeko "ea gatazkan jarraitu nahi duen" edo "errespetuaren alde egingo duen", bere erantzunaren arabera ikusi baita "kataluniar guztiak ordezkatu nahi dituen edo Puigdemont ordezkatu nahi duen".

Xavier Domenech Catalunya en Comu-Podemeko talde parlamentarioko buruak, Carles Puigdemonten figurari heltzen ez jarraitzeko eskatu dio Torrari: "Kataluniak erresistitzeari utzi eta eraikitzen hasi beharra dauka, irabazteko"

Bere interbentzioan, Domenechek esn du independentistek akatsa egin dutela bost hilabete pasatzen utziz hauteskundeetatik: "Zuek irabazi zenituzten A21eko hauteskundeak, horretaz ez dago zalantzarik, baina gero porrot egin duzue horren gestioan" esan du. Torraren goizeko hitzaldiak "galdera asko" uzten dituela "erantzun gabe" esan du, "nahiz eta hitzaldi ona izan Puigdemontentzat eta CUPeko jendea konbentzitzeko".

Oso bestelako iritzia plazaratu du arratsaldeko saio honetan Carles Riera CUPeko diputatuak eta kritiko agertu da JxCateko hautagaiaren diskurtsoarekin, alderdi horrek eta ERCk "ziklo autonomikoan" sartu nahi dutela uste baitu, "desobedientzia eta aldebakartasunaren bidetik errepublika eraiki beharrean".

CUPeko ordezkariak bere hitzaldian esan du urriaren 1eko eta 3ko mobilizazioen "duintasunaren" eta "Espainiako Estatuaren errepresioaren artean", bi alderdi horiek "legalitatea onartuko duen autonomia bat ezarri" nahi dutela.

Sergi Sabria ERCren Parlamenteko buruak esan du bat egiten dutela Quim Torrarekin, baina Espainiako Gobernuari egin dion elkarrizketa proposamenean baldintza egokiak bilatu behar direla gaineratu du: "Espainiak galdu edo irabazi egiten baitu, baina inoiz ez du bere borondatez negoziatzen". Bere interbentzioan, "155. artikulua bertan behera uzteko eta proiektu partekatu honen alde lan egiteko konpromisoa" agertu du Sabriak.

Amaitzeko, Eduard Pujol Junts per Catalunyako bozeramaileak goraipatu egin du euren hautagaiaren hitzaldia eta ohartarazpena egin du: "urriaren 1arekiko konpromisoa atzera bueltarik gabea da, urriaren 1ak dena aldatu baitzuen".