Auzitegi Gorenak atzera egin eta 'proces'-eko indultuak berrikusiko ditu

Auzitegi Gorenak bere hasierako irizpidea zuzendu du, eta aldeko hiru boto eta kontrako bi botorekin, 'preces'-agatik espetxe zigorra betetzen ari ziren Kataluniako lider independentistei emandako indultuak berrikusiko ditu orain, Aretoa osatzen duten magistratuak aldatu ostean.

Iturri juridikoek jakinarazi dutenez, Auzitegi Goreneko Administrazioarekiko Auzien Salako Bosgarren Atalak boto bakar batez baietsi ditu demandatzaileek sala horrek berak indultuen emakida ez berrikusteko hartutako erabakiaren aurka jarritako berraztertzeko errekurtsoak.

Bosgarren Atalak, joan den urtarrilean, ukatu egin zituen (aldeko bi boto eta kontrako hirukin) akusazio partikularrek eta alderdi politikoek (PP, Vox eta Ciudadanos) buruzagi independentisten indultuak atzera botatzeko aurkeztutako errekurtsoak, helegileek ez zutelako betetzen Estatuko Abokatutzak eskatutako legitimazio aktiboaren baldintza. 

Erabaki horren aurka, berraztertze-errekurtsoa aurkeztu zituzten aipatu helegileek, eta kide desberdinez osatuta dagoen sala baten eskuetan dago orain. Izan ere, urtarrilean presidente zen Segundo Menendezek erretiroa hartu du eta Octavio Herrero aurrerakoia jarri dute haren ordez. Balantza desorekatu duena, baina, Angeles Huet atera eta Ines Huerta kontserbadorea sartzea izan da. 

Hala, errekurtsoen aurkako botoa eman dute Octavio Herrero eta Angel Arozamena aurrerakoiek, eta aldeko botoa eman dute Ines Huerta, Fernando Roman eta Wenceslao Olea kontserbadoreek.

Auzitegiak, beraz, prozedurekin jarraitzeko agindu du, eta Estatuko Abokatutzak errekurtso guztietan helegileen legitimaziorik ezari buruz planteatutako erabakia epaiaren izapidera atzeratu du.

Salak errekurtso guztiak baietsi ditu, alderdienak barne, Pro Patrimonium Sijena eta Jerusalén erakundeek jarritakoak izan ezik; horiek, gainera, aho batez ezetsi dira.

Erreakzioak

Espainiako Gobernuko bozeramaile Isabel Rodriguezek Kataluniako lider independentisten indultuen "baliagarritasuna" defendatu du, Katalunian bizikidetza eta normaltasuna berreskuratzeko "mesede" egiten dutelako. Nolanahi ere, adierazi du Gobernuak beti defendatzen duela "bere jarduera guztien legezkotasuna" eta, indultuen kasuan, "legezkotasuna ez ezik, Katalunian normaltasun hori berreskuratzeko duten erabilgarritasun "ukaezina" ere aldarrikatu du.

Pere Aragonès Generalitateko presidenteak ohartarazi du Auzitegi Gorenaren irizpide-aldaketak erakusten duela Auzitegi Gorena "oso politizatuta dagoela", eta haren erabakiak epaileen "kolore" politikoaren mende daudela. "Espainiako justizia, Kataluniako gaietan, oso politizatuta" dagoela salatu du Aragonèsek. Itxaropena du, hala ere, "gauzak okertzeko lan egiten duten alderdiek" aurkeztutako helegiteak baztertuko direla azkenean. 

Aina Vidal En Comú Podemek Kongresuan duen bozeramaileak uste du Auzitegi Gorenaren erabakia "akatsa" dela, eta "albiste oso txarra" dela, Espainiako Gobernuaren eta Kataluniako Gobernuaren "gaitasun politikoa oztopatzen" duena. "Herri honek denbora luzez falta izan duen lasaitasunerantz, elkarrizketarantz eta politikarantz joan behar du", azpimarratu du.

Edmundo Bal Ciudadanoseko bozeramailearen ustez, zigortuak "espetxera itzultzeko minutu bat gertuago" daude. Bozeramaile laranjaren arabera, ebazpen hori indultuak deuseztatzera bidean urrats bat dira. Azpimarratu du, gainera, Ciudadanosek aurkeztutako argudioan oinarritzen dela "onura publikoko kausarik" eza, alegia. 

Buruzagi independentistek ere erreakzionatu dute. 

Jordi Turull Juntseko kontseilari ohi eta presidenteordeak honakoa idatzi du Twitterren Auzitegi Gorenak indultuak berrikusteko hartutako erabakiaren ondoren "Sinesmenak eta konpromisoa sendoagoak dira oraindik ere, haien bidegabekeriak baino"..

Josep Rull Governeko kontseilari ohi indultatuak, berriz, zera idatzi du Twitterren: "Asteartea, 2022ko maiatzak 24. Europar Batasuneko Justizia Auzitegia, justizia. Espainiako Erresumako Auzitegi Gorena, mendekua".

Eta beste txio batean, Rullek William Ernest Henleyren 'Invictus' poemaren zati bat aipatu du: "Eta, hala ere, urteen mehatxuak beldurrik gabe aurkituko nau, orain eta beti. Ez du axola bidea zein estua izan den, ezta nire bizkarrean zenbat zigor ditudan ere. Nire patuaren jabe naiz, nire arimaren kapitaina naiz ".

Parlamenteko presidente ohi Carme Forcadellek ohartarazi duenez, "errepresioak jarraizten du, baita gure borrokak ere. Ezerk ez gaitu geldituko".