PSOEren eta EAJren akordioak falta diren eskumenak transferitzea eta nazio aitorpenaz negoziatzea bermatzen du

"Oso akordio zabala da", 10 orrialdetan barrena xehetuta, eta konpromiso zehatzak dituena hainbat gairen inguruan: Euskadiri dagozkion eskumenen transferentzia, autogobernua (egungoa zein etorkizunekoa), lan harremanak edo fiskalitatea. Hala laburbildu du Andoni Ortuzar EAJren EBBko presidenteak gaur Pedro Sanchez PSOEko idazkari nagusiarekin izenpetutako ituna. 

Ituna tarteko, EAJk "bai" bozkatuko du Sanchezen inbestiduran, eta "egonkortasuna" emango dio legealdiari, "betiere adostutako konpromisoak bete eta aurrerapausoak ematen badira". "Akordio ona da Euskadirentzat", erantsi du Ortuzarrek. 

Akordioak Gernikako Estatutuan jasotako transferentzia guztiak, Gizarte Segurantzarena barne, Euskadiri "eskualdatzea" bermatuko du, eta etorkizuneko EAEren autogobernua negoziatzeko oinarriak jarri. Bi urteko epea izango da horretarako, zehaztu dutenez. Etorkizunera begira, "Euskadiren nazio aitorpena negoziatzea" adostu dute bi alderdiek, baita EAEko eskuduntzak eta "aldebikotasuna eta foralitatea oinarri dituen berme sistema" babestea ere. 

EAJren presidentearen hitzetan, "Eusko Legebiltzarraren gehiengoak eskatutakoei erantzun beharko diete adostasun horiek". Nafarroako autogobernuari ere eragingo dio itunak, eta sei hilabeteko epean foru erkidegoak bi eskuduntza berri jasoko dituela zehaztu: ikerketa, garapena eta berrikuntzaren ingurukoa, eta beken ingurukoa. 

Akordioak lan arloan

"EAJren aldarrikapen historikoetako bat" ere jaso du izenpetutako dokumentuak. Hala, aurrerantzean, EAEko hitzarmenek lehentasuna izango dute —hori izan zen, hain justu, jeltzaleek lan erreformaren kontra bozkatzeko arrazoia—.

Halaber, "akordio horri esker, Kontzertuaren Batzorde Mistoak lan-eskaintza publikoen berrezarpen-tasa ezarri ahalko du, baita langile publikoen soldata igoerak ere, eta Nafarroan berdin", adierazi du Ortuzarrek. 

Gainera, itunak konpondu egingo ditu azken lege aldaketek "kooperatiben berezko gizarte aurreikuspeneko sisteman" eragin dituzten gorabeherak. 

Hitzarmenak beste arlo batzuetan

Fiskalitatearen arloan, itun ekonomikoa zabalduko da eta zerga berriak eta zorraren mugak ituntzea adostu da, Kontzertuaren Batzorde Mistoan ezarriak.

Segurtasunari dagokionez, Ertzaintzaren eskumenak indartuko dira, baita nazioarteko segurtasun-esparruetan duen presentzia eta parte-hartzea ere.

Usansolo Bizkaiko 113. udalerri gisa erregistratu ahalko da, EAJko presidenteak azpimarratu duenez; izan ere, sei hilabeteko epean, orain arte eskatzen zen gutxieneko biztanleria-atalasea (5.000 biztanle) aldatu egingo da eta 4.000 biztanletan ezarriko da.

Gainera, "amaiera sinboliko" gisa, Ortuzar pozik agertu da akordio hau lortzeagatik, honen bidez, "100 milioi euro emango baitzaizkie euskal erakundeei lau urtean, euskarak unibertso digital berrirako jauzia egiteko erronkari ekiteko".

Akordioa betearazteko batzordea

Ortuzarrek iragarri du batzorde bat sortuko dutela sei hilean behin akordio horien betetze-mailaren jarraipena egiteko. "Ez da ez naizela presidentearen hitzaz fio, baina hitz hori beteko ez balitz...", esan du.