Espainiak euskara, katalana eta galizieraren "izaera bakarra" berretsi du EBn ofizialtasuna lortzeko

Europar Batasunean euskara, katalana eta galiziera ofizial bihurtzeko eztabaida asteazkenean itzuliko da Europar Batasuneko Gai Orokorren Kontseiluko mahaira, hiru hizkuntza koofizialen onarpenak antzeko eskaerei ateak irekiko dizkien beldurrak uxatzen saiatuko den Espainiako proposamen berri batekin.

Berrikusitako proposamenak eranskin bat gehitzen du, eta bertan azpimarratzen du hiru hizkuntzek berariazko baldintza batzuk betetzen dituztela, hizkuntza gutxituak dituzten beste estatu batzuekiko aurrekari ez izateko aukera emango luketenak.

Eranskinean, besteak beste, honako faktore hauek aipatzen dira: hirurak "estatu kide berekoak" dira, estatu kide horretan Konstituzioaren aitorpena dute eta EBko estatu bateko Parlamentu nazionalean lan egiteko hizkuntzak dira jadanik. Aldaketa hori, hain zuzen ere, Espainian uztailaren 23ko hauteskundeen osteko inbestidura negoziazioen ondorioz iritsi zen.

Era berean, adierazten dute hamar urte baino gehiagoko bidea duten administrazio akordioak daudela hizkuntza horiek Europar Batasuneko hainbat erakundetan erabili ahal izateko, Europako itunak hiru hizkuntzetara itzulita daudela eta Espainiak "Batasuneko erakundeetan erabiltzearen ondoriozko" kostu guztiak bere gain hartzeko konpromisoa hartu duela.

Argudio horiek Jose Manuel Albares Espainiako Azterri ministroak behin eta berriz errepikatu zituen Gai Orokorren Kontseiluaren aurreko bi bileretan, Espainiaren proposamenari heldu ziotenean, eta ez zen lortu EBko estatu kideen adostasuna, erabaki horren kostuari eta ondorio praktikoei buruzko mesfidantzak zirela eta.

Espainiaren proposamenarekin mesfidati den estatu bateko iturri diplomatiko batek azaldu duenez, Espainiak bart bidali zien proposamena bazkideei, gaztelaniaz soilik, eta, beraz, gaur bakarrik eskuratu ahal izan dute aztertu beharreko testua. Gainera, erantsi du proposamenak oraindik ez duela "inolako eragin legalik, finantzariorik eta praktikorik" jasotzen.

Bi arrazoi horiek direla eta, ez du uste ministroek asteazkeneko bileran "serioski aintzat har" dezaketen proposamena denik, eta uste du gaia berriro aztertuko litzatekeela abenduko Gai Orokorren Kontseiluan, Espainiaren presidentziak zuzenduko duen azkenekoan.