Clemente, Antton Valverde, Laboral Kutxa-Euskadi Fundazioa, EAA eta Armando Llanos, Sabino Arana saridunak

Sabino Arana Sarien XXXV. ekitaldia egin dute gaur, Iñigo Urkullu lehendakaria buru izan duen gala batean, eta Antton Valverde musikari donostiarrak, Laboral Kutxa-Euskadi Fundazioa txirrindulari taldeak, Armando Llanos arkeologo gasteiztarrak eta Javier Clemente futbol entrenatzaileak jaso dituzte sariak, Mireia Zarate Sabino Arana Fundazioko lehendakariaren eskutik.

Sabino Arana Fundazioak saridunen "konpromisoa, eskuzabaltasuna, ahalegina, komunitatea sortzeko gaitasuna, nortasun kolektiboa eta lidergo-gaitasuna" nabarmendu ditu, Mireia Zarate Fundazioko presidentearen arabera.

Sarituen merituen artean, Antton Valverde musikari donostiarraren pianoak, besteak beste, "Lauaxeta", "Lizardi", "Gandiaga" eta "Txirrita" poeta euskaldunak ezagutzea ahalbidetu duela azpimarratu du. "Valverde, iraganaren eta orainaren arteko loturaren adibide da; kalitatezko obretan oinarritutako berritzearena", adierazi du. Valverdek adierazi du ez zukeela inoiz imajinatuko sari hau jasotzea, baina oso pozik agertu da "ohorea" delako. Saria eskertzeko, Esteban Urkiaga 'Lauaxeta'ren poema bat abestu du, pianoaz lagundurik. 

Laboral Kutxa-Euskadi Fundazioko emakumezkoen txirrindularitza taldeko kideak ere goraipatu ditu Zaratek, "pedalei eraginez gero eta gertuago baitaude munduko txirrindularitzaren elitera iristeko, indar handiko balioak ardatz hartuta: talde-lana, inklusioa eta berdintasuna". Emakumezkoen Laboral Kutxa-Euskadi Fundazioko enbaxadore Joane Somarribak, taldeko hainbat txirrindularik eta Euskadi Fundazioko presidente Aitor Galdosek jaso dute saria. Emakumezkoen kirola eta, zehazki, txirrindularitza, "oso kirol zorrotza, lan, sakrifizio eta esfortzu handia eskatzen duena" ikusarazteko balio duela adierazi du Somarribak.

Euskal Artzainak Ameriketan (EAA) elkarteak ere jaso du saria. Zaratek azpimarratu du Ameriketako euskal artzainek, beren ondorengoekin batera, asmatu dutela "bi kultura eta bi hizkuntza" bateratzen. Laura Igantzi EAA elkarteko presidenteak eta artzain talde batek jaso dute saria, eta "Ameriketan ibili diren euskal artzainek egindako lana goraipatzeko eta txalotzeko" balio duela esan du.

Armando Llanos arkeologoak egindako ikerketa-lan "sendoa" ere azpimarratu du Fundazioak. "Ahalegin pertsonala, baina baita konpromiso komunitarioa ere, Arabako Arkeologia Institutua sortu izanak erakusten duen bezala", nabarmendu du Zaratek. Saria jaso ostean, On Joxe Migel Barandiaranen ikasle izan zen ikertzaile eta arkeologo arabarrak hunkiturik adierazi du bere ikerketa-ibilbidean funtsezko hiru helburu izan dituela, "ikertzea, babestea eta zabaltzea", eta deitoratu egin du batzuetan aztarnategi garrantzitsuak suntsitu izan direla "haien kontserbazioa babestuko lukeen legerik izan ez delako".

Arriaga Antzokiko oholtzara igotzen azkena Javier Clemente Athleticeko entrenatzailea izan da. Mireia Zarateren ustez, "sendotasunaren eredu da". "Javik bere sendotasuna erakutsi du entrenatzaile bezala, baina baita lider bezala ere". Javier Clementek aitortu du "ustekabeko saria" izan dela, eta "txapeldun" izan zirenean Athleticeko entrenatzaile izateagatik jaso duela uste duela. "Sari honen erdia jokalariei dagokie, gehien lan egin, izerditu eta sufritu zutenak izan baitziren", gaineratu du.