AHTari buruzko eztabaida publikoa "esperpento politikotzat" jo du Pello Otxandianok

Pello Otxandiano EH Bilduren Eusko Legebiltzarreko bozeramaileak "esperpento politikotzat" jo du Abiadura Handiko Trenak Nafarroarekin izan dezakeen loturari buruz euskal erakundeetako agintariek egunotan egin duten eztabaida publikoa. Bere hitzetan, jarduera horiek "kontuak emateko eta dimititzeko arrazoi" izan litezke.

Radio Euskadiko "Boulevard" saioan egindako elkarrizketa batean, Otxandianok zalantzak agertu ditu "alderdi berekoak diren" arduradun politikoek, lotura bat edo bestea defendatzean, duten bultzadari buruz. "Lurralde-interesak jokoan" dauden susmoa agertu du eta oso larria iruditu zaio "herria eta demografia-fluxuak antolatzeko ikuspegirik" ez egotea.

Ezkio-Itsasoren edo Gasteizen alde egiten ote duen galdetuta, EH Bilduko bozeramaileak argi utzi du bere alderdiak beste aukera bat proposatu duela: "Gasteiz Iruña eta Burgosekin lotuko duen prestazio handiko tren bat, egungo bide-zabalera aprobetxatuko duena eta salgaien garraiorako eta aldirietako tren gisa balioko duena".

Bestetik, EH Bilduko kideak ez du baloratu nahi izan osasun sistemari buruzko osteguneko mahaian ez egoteko ELAk hartu duen erabakia. Hala ere, argi utzi du EH Bilduk inoiz ez duela bere presentzia zalantzan jarri: "Osakidetza onbideratu behar bada, politika publiko asko errotik aldatu beharko dira. Ez zaigu bururatu ez egotea".

Hala ere, bere aburuz, epe luzerako gaiak jorratuko dituen mahai horretan parte hartzeak "ez du kentzen, Legebiltzarrean egindako eztabaidaren bidez, premiazko aldaketak eskatzea". Laudion gertatutakoak emergentzietako ESIan aldaketak lehenbailehen behar dituela azpimarratu du, eta uste du "normala izango" litzatekeela "Sailburuak berak Legebiltzarrean agerraldia eskatzea".

Izan ere, Otxandianok "normaltasunaren barruan" sartu du EH Bilduk Osasun sailburuaren agerraldi-eskaera egin izana Legebiltzarrean eta hainbat gairi buruz erregistratu duen galdera sorta.

"Gure ardura da oposizio arduratsua egitea", esan du, eta hori Legebiltzarrean eztabaidatzearekin lotu du. "Parlamentua geldirik egon da zazpi hilabetez. Herrialdea martxan jartzeko ordua da".

Bere ustean, EH Bilduk "ez du ez erasotzeko ituna hautsi". Are gehiago, Legebiltzarreko jarduera "erasotzat jotzea karga politiko handia duen hiperbolea" dela adierazi du. Hori dela eta, "hizkuntza eta semantika erantzukizunez erabiltzeko" deia egin du.

Azkenik, oposizioko buruak jakinarazi du Pradales lehendakariari bidali dizkiola itun etikoari buruzko dokumentuari EH Bilduk egindako ekarpenak. Pradalesen proposamenean faltan bota du "sumindura eta polarizazio egoera ekarriko luketen kausak zehaztea", baita "gizarte zibilarekin batera irtenbideak planteatzeko modua" ere. Ildo horretan, trantsizio energetikoa eta gisako gaietan eztabaida-prozesu bat artikulatzearen aldeko apustua egin du.

Horrez gainera, itun horretan "klientelismoaren" bukaera sartu behar dela ere uste du EH Bilduk. Pello Otxandianoren hitzetan, kudeaketa publikoaren "ejenplaridadeaz" hitz egin behar da, derrigorrezkoa da "lagunkeriarekin dagoen arazoa mahai gainean jartzea".