Erkidegoei 83.252 milioiko zorra barkatzea proposatu du Moncloak: Andaluzia eta Katalunia, onuradunenak

Maria Jesus Montero lehen presidenteorde eta Ogasun ministroak gaur iragarri du Zerga eta Finantza Politikako Kontseilura (CPFF) asteazkenean eramango duen proposamena, erkidegoei 83.252 milioi euroko zorra barkatzeko.

Tartean ez daude Euskal Autonomia Erkidegoa (EAE) eta Nafarroa, ez baitaude erregimen komuneko sisteman. Hala ere, testuingurua aprobetxatuz, foru-sistemen bidez ere antzerako konpentsazioa proposatu dute bi erkidegoek.

Eusko Jaurlaritzak EITBri azaldu dioenez, "Euskadik bere finantzaketa-sistema propioa du, biltzen duguna gastatzea ahalbidetzen digun erantzukizun fiskaleko sistema".

"Euskadik ez du iritzirik emango beste lurralde batzuetako proposamenei buruz, baldin eta EAEri fiskalki eragiten ez badio", gaineratu dute. "Estatuak erkidegoei emandako maileguen eredua ez dator bat Kontzertu Itunaren ereduarekin eta horrek dakarren aldebakarreko arriskuarekin, eta, beraz, ez dugu inoiz Likidezia Funts Autonomikora jo", gogorarazi dute.

"Ez dugu iritzirik emango erregimen komuneko erkidegoentzat adosten denari buruz, Estatuarekin dugun harremana aldebikoa baita, eta Ekonomia Itunaren Batzorde Mistoaren barruan dago. Kontzertuarentzat errespetu osoa eskatzen dugu eta, era berean, erregimen komuneko sistema errespetatzen dugu", erantsi du Jaurlaritzak.

Monterok Ogasun Ministerioaren izenean aurreratu duenez, Oriol Junqueras ERCren buruak Espainiako Gobernuarekin Kataluniak Estatuarekin duen zorraren % 22 barkatzeko akordioa iragarri ostean, Espainiako Gobernuak 83.252 milioi euroko zorra barkatzeko proposamena egingo du.

Horretarako, Monterok jakinarazi du gaur bertan Estatuak bere gain hartuko duen zenbatekoa zehazten duen metodologia igorri diela erkidegoetako gobernuei, eta erkidegoek Zerga eta Finantza Politikako Kontseiluan bozkatu ahal izango dutela.

Halaber, Monterok zehaztu du zorra barkatzea borondatezkoa dela eta ez dagoela inolako "baldintzaren" menpe; beraz, erkidegoetako Gobernu bakoitzari dagokio proposamen horrekin bat egiten duten ala ez erabakitzea, Estatuak zorraren ehuneko zati bat bere gain har dezan.

Nolanahi ere, Andaluzia eta Katalunia izango lirateke proposamen horri esker onura handiena jasoko luketen erkidegoak; izan ere, Estatuak 18.791 milioi euro hartuko lituzke bere gain lehenengoaren kasuan, eta 17.104 milioi euro bigarrenaren kasuan, bien artean guztizko zorraren % 43 baino gehiago.

Horien atzetik daude Valentzia (11.210 milioi), Madril (8.644 milioi), Gaztela-Mantxa (4.927 milioi), Galizia (4.010 milioi), Gaztela eta Leon (3.643 milioi), Murtzia (3.318 milioi), Kanaria Uharteak (3.259 milioi), Aragoi (2.124 milioi), Balearrak (1.741 milioi), Extremadura (1.718 milioi), Kantabria (809 milioi) eta Errioxa (448 milioi).

Dagoeneko Alberto Nuñez Feijoo PPren buruzagiak iragarri du bere alderdiak gobernatzen dituen erkidegoek proposamenaren aurka bozkatuko dutela. Azpimarratu duenez, bere alderdiak asteazkeneko Zerga eta Finantza Politikako Kontseiluan erkidegoen finantziazioaz hitz egin nahi du, eta "ez independentisten babesaren balioaz" Pedro Sanchezek Moncloan hilabete batzuk gehiago jarraitzeko.

"Beraz, Alderdi Popularreko presidenteek ezetz bozkatuko dute. Ezberdinkeriari, kudeaketa txarrari, pribilegioei eta Gobernuko presidentearen erosketari ezetz esango diote", kritikatu du Feijook.