Administrazioan behin-behinekotasuna murrizteko "premiazko neurriak" onartu ditu Nafarroako Parlamentuak

Administrazio Publikoko behin-behineko langileen kopurua murrizteko premiazko neurriak jasotzen dituen Foru Lege Dekretua baliozkotu du gaur Nafarroako Parlamentuak. PSNk, EH Bilduk eta Geroa Baik alde bozkatu dute, Zurekin Nafarroa taldea abstenitu egin da, eta UPNk, PPNk, Voxek eta atxiki gabeko parlamentariak aurkako boza eman dute.

Nafarroako Gobernuak eta Administrazioan lehen indarra den LAB sindikatuak adostutako dekretu honetan hautsak gehien harrotu dituen puntuetako bat lan-utzialdiei dagokiena da, gogortu egingo baitira borondatezko eszedentzia hartzeko baldintzak funtzio publikoan.

Sindikatuen gehiengoak gogor kritikatu du ekimena, eta behin-behinekotasuna baino "eskubideak" murriztuko dituela salatu dute AFAPNA, CCOO, ELA eta UGTk. Lekualdatzeei eta eszedentziei dagokienez atzerapausoak ikusten dituzte. 

Behin-behineko langileen kopurua % 8ra jaistea da dekretuaren helburua. Hala esan du Amparo Lopez Barneko, Funtzio Publikoko eta Justiziako kontseilariak. Horretarako, bere hitzetan, lan-eskaintzen prozedurak arinduko dituzte, betetzeko zailak diren postuak erakargarri bihurtzeko pizgarriak eskainiko dituzte eta eszedentziak hartzeko baldintzak aldatuko dituzte. PSNk, EH Bilduk eta Geroa Baik uste dute eszedentzia eskatzeko baldintzak zorrozteak balio dezakeela Osasunbideko plazak betetzeko, hainbat profesionalek plaza atera orduko eszedentzia eskatzen dutelako. 

Neurriak

Hemendik aurrera, Nafarroako Administrazioan plaza bat lortzen duen langileak gutxienez bi urte egin beharko ditu lanpostu horretan borondatezko eszendentzia eta lekualdaketa eskatu aurretik.

Era berean, hautaketa prozesuak arintzeko, neurri-sorta onartu da. Tartean, epeak murriztu egingo dira. Horrez gain, lekualdatze lehiaketetan, antzinakotasuna eta, hala badagokio, hizkuntzak soilik baloratuko dira.

Osasubidean betetzeko zailak diren lanpostuetarako eskainiko diren pizgarriak dira beste berritasuna.

Alderdien jarrera

Gogor kritikatu du dekretua UPNko Marta Alvarez parlamentariak. Bere hitzetan, ez du behin-behinekotasun tasa murriztuko. Adierazi du kontrakoa ekarriko duela, eta langile publikoen eskubideak zapalduko dituela. Are, erantsi du oposizioarekin hitz egin gabe eta gehiengo sindikalari bizkarra emanda onartu dela.

Nafarroako Gobernuaren bazkide den Zurekin Nafarroako Miguel Garridok, berriz, bere taldearen "abstentzio kritikoa" azaldu du. Edukia bera baino, dekretua onartzeko moduak eragin du ezkerreko taldea abstenitzea. Halaber, defendatu du eraldaketa nahi bada, sindikatuen gehiengoarekin adostasunak bilatzea dela bidea.

Bere aldetik, Ainhoa Unzu sozialistak adierazi du dekretuak Administrazioko lanpostu guztiak betetzea ahalbidetuko duela, eta, horrenbestez, zerbitzu publikoa bermatuko zaiela herritar guztiei.

Ildo beretik, EH Bilduko Adolfo Araizek ere onartutako neurriak babestu ditu, ziur baitago behin-behinekotasun tasa % 8ra murriztea ekarriko dutela.

Azkenik, Blanca Regulez Geroa Baiko parlamentariak aitortu du "adostasun zabalagoa" nahiago luketela, baina ez du zalantzarik dekretuak langile publikoen egoera hobetzeko balioko duela.