BILERA-SORTA
Gorde
Kendu nire zerrendatik

Sanchez EH Bildurekin eta EAJrekin bilduko da asteazken honetan, alderdien arteko harremanak aztertzeko

ERC ere bilduko da Sanchezekin, Espainiako Gobernuak antolatutako bileren egutegiaren barruan. Podemosek ez du bileretan parte hartuko. Bestalde, Espainiako Gobernuak proposatu du Sanchezek Kongresuan Cerdan, Leire eta Europako gaien inguruan agerraldia uztailaren 9an egitea.

 

pedro sanchez efe
Pedro Sánchez artxiboko argazki batean. EFE.

Pedro Sanchez Espainiako Gobernuko presidentea EH Bildu, EAJ eta ERC alderdiemn Kongresuko bozeramaileekin bilduko da asteazken honetan, Moncloan, Espainiako Gobernuak inbestiduraren aliatuekin duen harremana aztertzeko, PSOEko Antolakuntza idazkariak ustelkeria sare batean izan omen duen inplikazioaren berri jaso eta gero.

Astearte honetan Junts alderdiarekin bildu ostean, Espainiako Gobernuak asteazkenerako (ekainak 18) antolatutako bileren egutegia baieztatu dute taldeen iturriek.

10:30ean Gabriel Rufian ERCren bozeramailea hartuko du; 11:30ean EH Bilduren ordezkariekin bilduko da; eta 12:30ean EAJrenarekin.

Bilera-sorta horretatik aldendu da Podemos, eta horren buruak, Ione Belarrak, Kongresuan emandako prentsaurrekoan esan du Sanchez ezin izango dela "konponbidearen parte izan" herrialdeari eragiten dioten ustelkeria kasuen aurrean, "PSOE arazoaren parte baita".

Uztailaren 9an, Sanchezen agerraldia Kongresuan

Espainiako Gobernuak Kongresuko bozeramaileei proposatu die Pedro Sanchezek uztailaren 9an agerraldia egitea. Horretan, Espainiako presidenteak gai hauek aztertuko ditu: Santos Cerdanen inplikazioa Koldo Garciaren eta Jose Luis Abalosen ustezko komisioen sarean, Leire Diez zinegotzi sozialista ohiaren jarduerak UCOren aurkako frogen harira, eta nazioarteko gaiak, hala nola Europar Batasuneko hurrengo Kontseilua eta NATOren goi-bilera.

Moncloak azpimarratu duenez, aste honetan ezinezkoa da agerraldi hori egitea eta hurrengo astean Sanchezek nazioarteko bidaia du, beraz, uztailaren 9ra atzeratu du azalpenak emateko bilera hori, PPren kongresua eta PSOEren Batzorde federalaren ostean.

Gauzak horrela, PPk Bozeramaileen Batzorde berri bat eskatuko du aste honetan bertan Sanchez ager dadila presioa egiteko, izan asteazken honetan edo ostegunean, jada programatuta dagoen Osoko Bilkura amaitzen denean.

Politikari buruzko albiste gehiago

Gehiago kargatu