GOIDIAren biktimek diote Feijook erantzun diela ezin duela Mazon kargutik kendu, eta agintean jarraitzea defendatzen duela

Christian Lesaec Dana Horta Sud-Valencia biktimen elkarteko presidenteak gaur azaldu duenez, Alberto Nuñez Feijoo PPko presidenteak erantzun die berak ezin duela Carlos Mazon Valentziako presidentea kargutik kendu, baina konpromisoa hartu du Generalitateak Espainiako Gobernuarekin negoziatu dezan, kaltetutako udalerrien berreraikuntza egitasmo bakar batean bateratzeko, eta ez bi plan ezberdinekin, orain gertatzen den bezala.

Hala adierazi die elkarteko presidenteak kazetariei, Feijoorekin Genova kaleko PPren egoitzan bildu eta gero. Batzarrean, adierazi duenez, PPko presidenteak Mazoni deitu diola agindu du, Pedro Sanchezen Gobernuarekin negoziatzeko bide hori ireki dezan.

PPko presidentea biktimen elkarteekin bildu da, besteak beste, SOS Desaparecidos eta Dana Horta Sud-Valencia elkarteekin. Bilera PPk Madrilen duen egoitza nagusian izan da, uztail hasieran eskatu eta aste gutxira.

Bi ordu baino gehiagoko bilera "adeitsu" baten ostean, Lesaecek Feijoori azaldu dio elkarteko kideek uste dutela Mazonek ez lukeela Generalitateko buruzagitzan jarraitu behar, eta PPko buruzagiak kargutik kendu beharko lukeela.

"Ez diogu dimisioa argi eta garbi eskatu, guk ezin diogulako dimisioa eskatu. Dimisioa Carlos Mazoni berari eskatu beharko genioke. Eskatu dioguna da, edo jakinarazi diogu, gure elkarteko kide askok uste dutela berak Carlos Mazon kargutik kendu beharko lukeela, baina bere erantzuna izan da ezin duela hori egin eta, gainera, berak ez duela horrela ikusten", azpimarratu du prentsari egindako adierazpenetan.

Feijook onartu duenez, "hondamendi honetan, Generalitatea ez da zuzen aritu". "Baina behin eta berriz esan du Generalitateak ez ezik Espainiako Gobernuak ere duela zuzen jokatu", gaineratu du, eta PPko buruak berretsi du Pedro Sanchezek ez duela bete Mazonekin itxitako akordioa, hots, Espainiako Gobernuak Generalitatearen esku jarriko zituela behar zituen baliabide guztiak.

Joaquin Amills SOS Desaparecidos elkarteko presidentearen ahotan, GOIDIAren osteko berreraikuntza fase honetan ez da unea Feijoori Mazonen dimisioa eskatzeko. "Guztiok batera arraun egiten ikasteko unea da", adierazi du.

Bestalde, Feijook biktimen elkarte horiei adierazi die ez zela "eraginkortasunik eza" egongo larrialdian gobernatu izan balu. Ohar batean, PPk adierazi du bileretako giroa "adeitasuna" izan dela, eta Feijook adierazi die "eraginkortasunik gabeko egoera hori ez litzatekeela gertatuko PPren Gobernu batekin, ez larrialdiaren lehen egunetako kudeaketan, ezta erantzunean ere".

Sanchezen eta sei ministroren aurkako kereilak eta salaketak artxibatu dituzte

Bestalde, Auzitegi Gorenak artxibatu egin ditu hainbat kolektibok eta elkartek Pedro Sanchez Espainiako Gobernuko presidentearen eta sei ministroren aurka jarritako kereilak eta salaketak, 2024ko urrian Valentziari eragin zion GOIDIaren aurrean ustez zuzen ez jokatzeagatik.

Auziak Pedro Sanchez Gobernuko presidentearen, Fernando Grande-Marlaska, Angel Victor Torres, Margarita Robles, Maria Jesus Montero eta Felix Bolaños ministroen eta Teresa Ribera ministro ohiaren aurkakoak ziren.