Vilaplanak epaileari esan dionez, Mazonen jarrera "lasaia" zen GOIDIaren eguneko bazkarian eta ez zuen presarik erakutsi

Maribel Vilaplana kazetariak 2024ko urriaren 29ko ezbeharreko GOIDIaren kudeaketa ikertzen ari den epaileari adierazi dionez, egun horretan Carlos Mazon Valentziako Generalitateko presidente ohiarekin izan zuen lan bazkarian haren jarrera "lasaia" zen eta ez zuen "presarik" sumatu harengan. Lekuko gisa deklaratu duen kazetariaren arabera, Mazon komunikatuta egon zen eta "mugikorrari adi" zegoen, "telefonoz hitz egiten zuen eta idatzi ere egiten zuen".

Hala adierazi du Vilaplanak Catarrojako 3 zenbakiko Instrukzio Epaitegian, lekuko gisa. Organo hori ari da 229 hildako eta kalte pertsonal eta material handiak utzi zituen GOIDIaren inguruko kudeaketa ikertzen.

Kazetaria 09:30ean zegoen zitatuta epaitegian, baina ordu erdi lehenago, 09:03an, agertu da; burumakur eta atean zain zituen kazetari saldoari adierazpenik batere egin gabe sartu da epaitegira. Uholdearen egunean ama galdu zuen gizon batek amaren argazkia erakutsi dio epaitegi atarian eta "egia esateko" eskatu dio.

Deklarazioaren hasieran, GOIDIaren egunean autoa utzi zuen aparkalekuko txartela eskatu dio  instrukzio-epaileak; duela gutxi jakinarazi zuen Mazonek bertaraino lagundu ziola, lan-bazkariaren ondoren. Kazetariak ezin izan du hala ere txartela eman, ez baitauka, eta magistratuak bere bankuari eta aparkalekua kudeatzen duen enpresari eskatuko die ordainagiria.

Jarraian, kazetariak presidente ohiarekin izandako bazkaria deskribatu du. Bazkaria lau orduz luzatu zen, 15:00etatik 18:45era. Esan duenez, bazkarian zehar Mazonek deiak jasotzen zituen bere mugikorrean, "altxatu eta erantzun egiten zien", esan du. Une batean gutun-azal batean dokumentu batzuk ekarri zizkiotela ere esan du, eta Mazonek haiek sinatu zituela. 

Hala, Vilaplanak adierazi duenez, presidente ohia ez zegoen egun horretan inkomunikatuta, "mugikorretik hitz egiten zuen eta idatzi ere egiten zuen", baina ez du telefonoaren tonua edo soinua gogoratzen. "Mugikorrak jotzen zuenean aldendu egiten", esan du. Azaldu duenez, Vilaplanak galdetu zion ea nahi al zuen bera handik joatea eta, kontatu duenez, Mazonek ezetz esan zion, ez kezkatzeko. 

"Pertzepzioa dut hitz egin, gutxi hitz egiten zuela, gehiago ari zela entzuten, hizketan baino", esan du eta gaineratu du "elkarrizketei buruz ezer ez" ziola esan presidenteak. "Ez zidan inoiz ezer aipatu, eta ez nuen hitzik entzun ez GOIDIari, ez Cecopiari ez euriei buruz", zehaztu du. 

17:30 aldera jaso zuen bideo bati buruz galdetuta -zeinetan Utiel (Valentzia) urez beteta agertzen zen- komunikatzaileak deitoratu du bera "erabiltzen" ari direla kontu horrekin. Familiako txat batean jaso zuela adierazi du, senar ohiak pasatu zion esteka bat zela, baina ez zuela ireki. Harridurazko emotikono bat jarri zuen. "Esteka hori ireki ez izanak atsekabetzen nau; izan ere, lehenago ikusi izan banu, 'kontxo' esan izango nukeen". Adierazi duenez, uste du Mazon mahaitik altxatu zen aldietako batean begiratu zuela familiako txat-a.

Horren harira, Vilaplanak adierazi du Mazonen jarrera "lasaia" zela, eta ziurtatu du ez zuela "presarik" sumatu harengan. Izan ere, azaldu duenez, jatetxetik irten eta aparkalekura joan zirenean, berak, Levanterentzat lan egiten duenak, futbol partida bat ikustera joateko eskatu zion, Elxen aurkako derbi bat.

Une horretan, "normaltasunez" paseatzen ari zirela esan du. Adierazi du berak ez zuela presarik, eta Mazonek ere ez zuela presarik. Beraz, futbolaz hitz egiten jarraitu zuten.

Behin aparkalekuan, kazetariak esan du bere autora joan behar izan zuela tiketa jasotzera, eta gero kutxazainera joan zela ordaintzera, eta bost minutu inguru behar izango zituela. Mazonekin egindako bazkarian Pradasen izena entzun ote zuen galdetuta, ez zuela gogoratzen esan du.

Vilaplanak ziurtatu duenez ez du inolako presiorik jaso, ezta indikaziorik ere, urriaren 29an Generalitateko presidentearekin izandako bazkariari buruz ezer esateko edo ez esateko.

Deklarazioaren berri izan duten iturri judizialek adierazi dutenez, Vilaplanak, akusazio partikularren eta popularren galderei erantzunez, azaldu du topaketa hartan "sasoiko produktuak eta botila bat ardo" kontsumitu zirela, eta ez zela koparik egon bazkalostean.

Vilaplanak azaldu duenez, bere zatia ordaindu nahi izan zuen, baina presidenteak ez kezkatzeko esan zion, "eginda dago" esan zion, baina ez zuen inor ikusi datafonorik mahaira ekartzen eta ez daki nola ordaindu zen jatordua.

Kazetariak ziurtatu duenez, ordu batzuk geroago, urriaren 30eko goizaldean, Mazonekin hitz egin zuen, eta hark esan zion "oso potoloa" izan zela gertatutakoa, eta ez zuela "ezer jakin" bazkaltzen ari ziren denbora horretan.

Gaineratu duenez, presidenteari bere izena ez ateratzeko eskatu zion eta horregatik bere burua "koldartzat" jo duela (deklarazioaren une honetan negarrez hasi da).

Bi egun geroago, presidenteak berriro deitu zion, asko sentitzen zuela esateko, baina bere izena atera beharko zuela, presio handia zuelako, eta "hobe zela kontaktu guztiak moztea". Elkarrizketa horren ostean, Vilaplanak esan du "izu krisi" bat izan zuela eta "dena ezabatu" zuela.