Sanchezek demokrazia defendatzeko deia egin du, PPk frankismoa "sanchismoarekin" parekatu duen bitartean

Pedro Sanchez Espainiako Gobernuko presidenteak demokrazia defendatzeko deia egin du ostegun honetan, Francisco Franco hil zela 50 urte bete direnean. PPren ustez, berriz, frankismoaren antzekoena “sanchismoa” dela iradoki du.

Sanchezek urteurrenaren berri eman du sare sozialetan zabaldutako bideo baten bidez. Bertan azpimarratu duenez, Espainia egungo "demokrazia betea eta oparoa" bihurtu zuen eraldaketaren hasiera ospatzen ari dira.

"Ospatu egiten dugu iritzia eman, pentsatu, bozkatu eta norberak nahi duena izatea", gaineratu du gobernuburuak. Defenda dezagun".

Bien bitartean, PPn, Alicia Garcia Senatuko bozeramaileak esan du "frankismoaren antzekoena sanchismoa" dela.

Isabel Diaz Ayuso Madrilgo presidentearen ustez, "demokrazia denok bat eginda aurrera begiratzea da", eta lehenengo gauza "Gerra Zibilaren ataria gaitzestea da, espainiarren arteko harresia eraikitzea, alegia", esan du.

Polemikoa izan da Maria Jose Catala Valentziako alkateak 50. urteurren honi buruz egin duen analisia. Lehenik eta behin, frankismoak alde "positiboak eta negatiboak" izan zituela adierazi du, eta gero atzera egin du, "gure herriaren aro beltza" dela esanez, "gainditu eta aurrera begiratzea merezi duena, izan zena gaitzetsiz".