Amaia Agirre, Getxoko alkatea: "Oposizioak dimititu dezadan eskatzen duelako ez dut dimitituko"

Amaia Agirre Getxoko alkateak ez du dimititzeko asmorik, Irurak Bat jauregiaren auziaren harira, oposizioko alderdi guztiek (PP, EH Bildu eta Elkarrekin Podemos) dimititzeko eskatu dioten arren. "Ez dut dimitituko oposizioak eskatzen duelako, ez dut kargua utziko proiektu bakartzat zarata egitea duenak eskatzen duelako", nabarmendu du. 

Alkateak azaldu duenez, "betiko moduan, irmo, etikaz eta erabakitasunez" jarraituko du lanean, "probokazioetan sartu gabe, eztabaida antzuetan minutu bat galdu gabe eta oposizioa txikizioa dela uste dutenen aurrean amore eman gabe". 

"Erakunde honen buru izaten jarraituko dut legitimitatea dudan bitartean, erantzukizunez, irmotasunez, etikaz eta lehenengo egunean hartutako konpromiari eutsita", gaineratu du. 

EAJk koalizioan gobernatzen du PSE-EErekin, gutxiengoan. Bi alderdiek 12 zinegotzi batzen dituzte, 9 jeltzaleek (gaur sei zeuden, dimisioa eman duten ikertutako hiru zinegotzien ordezkoek ez dutelako kargua hartu) eta 3 sozialistek; oposizioan, PPk (6), EH Bilduk (6) eta Elkarrekin Podemosek (1), berriz, 13 batzen dituzte.

PPk proposatutako testua izan da eztabaidatzen lehena, eta ez du aurrera egin, popularren eta Elkarrekin Podemoseko zinegotziaren babesa baino ez baitu jaso. EH Bilduk gogor kritikatu du ekimena, "une garrantzitsuetan udal gobernuari gutxiengoan emandako babesaren ostean aurpegia garbitzea" delakoan.

Bere aldetik, koalizio abertzaleak beste mozio bat aurkeztu du, alkateari 2022an onartutako Iruzurraren aurkako Plana aplikatzeko eskatuz, eta datozen hauteskundeetara arte Udala gidatzeko talde guztiak ordezkatuta egongo diren udal gestora bat eratzea proposatu du, baina bere taldearen babesa baino ez du lortu.

Aurrera atera dena talde moreak presaz aurkeztutako mozioa izan da, oposizio osoaren aldeko botoak batuta, alkateari dimisioa eman dezala eskatzeko.

Elkarrekin Podemosen testuak adierazi duenez, kasu honetan, ikerketa judizialak "irekita jarraitzen du eta aukera guztiak posible dira", baina deitoratu du gobernu taldearen eta, bereziki, alkatearen kudeaketa "ez da inoiz gardena eta zintzoa izan, guztiz kontrakoa". Hala, "oposizioko taldeen kontrola blokeatzeko egindako ahaleginek, jendaurrean agertzeari uko egiteak eta gai hori estali edo minimizatzeko ahaleginek, azkenean, egoera okertzea baino ez dute lortu", gaitzetsi du. Horregatik, alkateari dimisioa eskatu dio, "udal kudeaketaren azken arduraduna delako".

Bestalde, EAJk eta PSE-EEk babestu egin dute alkatea, eta oposizioari leporatu diote auzia politikoki aprobetxatzeko ahalegina.

Carmen Diaz alkateorde eta talde sozialistaren udal bozeramaileak aitortu du jauregia eraisteak "krisi instituzional larria" eragin duela, baina errefusatu egin ditu alkatearen dimisio eskaerak, "justiziarekiko errespetuagatik, osoko bilkura hau ezin delako auzitegi paralelo bihurtu".

Irurak Bat auzian nahastuta dauden hiru zinegotziak kargugabetzea onartu dute

Irurak Bat jauregiaren eraisketarekin lotuta, ikerketapean dauden Getxoko hiru zinegotziak (Irantzu Uriarte, Iñigo Urkitza eta Ignacio Uriarte) kargugabetzeko dekretua ere onartu dute gaurko osoko bilkuran. 

Atzo, Udalak eta EAJk komunikatu banatan jakinarazi zutenez, Aingeru Torrontegi Ayok, Carlos Sergio Atxotegik eta Elisabete Basañez Perezek ordezkatuko dituzte. 

Guztira hamar pertsona ikertzen ari dira, horien artean EAJren hiru zinegotzi ohi, Algorta auzoan dagoen eta tokiko babes maila zuen Irurak Bat jauregia eraisteagatik. Bertan, kooperatiba batek luxuzko 12 etxebizitza eraikitzeko asmoa zuen; EAJko bi kide kooperatibistak ziren.