Zapaterok deliturik egin izana ukatu du epailearen aurrean: "Egia nagusituko da, eta zalantzan daudenei konfiantza itzuliko diet"

Jose Luis Rodriguez Zapatero Espainiako Gobernuko presidente ohiak ukatu egin du Plus Ultra airelinearen alde eragiteko inolako esku hartzerik izan duela. Hala adierazi du Jose Luis Calama Auzitegi Nazionaleko epailearen aurrean egindako deklarazioan, iturri juridikoek jakinarazi dutenez. Deklarazioa amaitu ondoren, ohar bat zabaldu du, eta horretan errugabea dela azpimarratu du.

“Gehiago edo gutxiago kostatuko zaigu hori frogatzea, baina egia nagusituko da, eta gaur zalantza egiten dutenek berriz ere nigan konfiantza izatea lortuko dut”, adierazi du.

Zapatero gaur goizeko 09:12an hasi da deklaratzen, eta 11:00k arte erantzun die epailearen galderei. Orduan etenaldia egin dute, eta ondoren berriro ekin dio deklarazioari.

Presidente ohiaren agerraldia 12:28 aldera amaitu da, ia hiru orduz epailearen aurrean egon ondoren. Calamak Plus Ultra auziari buruz galdetu dio. Airelineak 53 milioi euroko diru laguntza publikoa jaso zuen 2021ean, eta presidente ohiari egozten zaio enpresaren alde egin izana, komisioen truke eta eragin trafiko sare baten buru zela.

Lehenik, epailearen galderen inguruan erantzun du, eta ondoren haren abokatu Victor Morenoren galderei. Auzian eragin trafikoan jardutea, erakunde kriminalen parte izatea, dirua zuritzea eta dokumentuak faltsutzea ikertzen ari dira. Horrez gain, epaileak duela gutxi zerga delitua eta kontrabandoa ere egotzi dizkio, haren bulegoko kutxa gotor batean gordeta zituen eta Poliziak atzemandako ia 80 bitxirekin lotuta. Bitxi horiek 1,3 milioi euroko balioa dutela kalkulatu dute.

Deklarazioan Fiskaltza eta herri akusazioa bertan dira; azken hori Alderdi Popularrak ordezkatzen du. Akusazioen aldetik, Alberto Duran abokatua izan da aretora sartzeko aukera izan duen bakarra. Iturrien arabera, sartu aurretik abokatuek telefono mugikorrak kanpoan utzi behar izan dituzte.

Inputazioaren berri zabaldu zenean egin bezala, Zapaterok berriro azpimarratu du ez duela inolako administrazio publikoren aurrean esku hartu Plus Ultraren alde. Horrela, ikerketaren hipotesi nagusia ukatu egin duela diote iturri juridikoek.

Bere errugabetasuna defendatu arren, epaileak eragin trafiko sare baten "erpinean" kokatu du. Epailearen ustez, Zapaterok "maila handiko harreman instituzional eta enpresarialak" jarri omen ditu sare horren zerbitzura, hirugarrenen aldeko erabakiak eta abantailak lortzeko; bereziki, Plus Ultraren alde.

Zapatero 08:48an iritsi da Auzitegi Nazionalera. Eraikinaren sarrera nagusitik sartu da, epaileek erabiltzen duten atetik, eta ez bisitarientzat ohikoa denetik. Gobernuko Presidentetzak hala eskatuta egin du, eta Auzitegi Nazionalak baimena eman dio.

Auzitegi Nazionalean deklaratu ondoren zabaldu duen oharrean, Zapaterok adierazi du epaitegiari "borondatezko baimen unibertsala" aurkeztu diola, haren izenean zuzenean nahiz zeharka dagoen sozietaterik, dirurik, finantza produkturik eta bestelako aktiborik ez duela egiazta dezan.

"Nik egin ez ditudan delitu oso larriak egozten dizkidate. Beti jokatu dut duin eta zintzo, eta orain hori frogatzeko lana dut aurretik. Erabateko gardentasunez eta konfiantza osoz egingo dut", nabarmendu du.

Zapatero Auzitegi Nazionalera iritsi denean, ehunka kazetari zituen zain, bai Estatukoak, bai nazioartekoak. Izan ere, inoiz inputatu gisa deklaratu behar duen lehen presidente ohia da, eta ikusminak muga guztiak zeharkatu ditu.

Auzitegiaren kanpoaldean Hazte Oir eskuin muturreko elkartearen jarraitzaileak ere izan dira, Zapateroren aurkako aldarriak oihukatzen, eta, paraleloan, kontrastea ekarri duen pasadizo bat: Retiro parketik entzuten zen musika klasikoa izan da pelikula honen soinu-banda.