Gobernuak neurri sorta berri bat onartuko du astelehenean Irango gerrari aurre egiteko

Gaur, astelehena, Ministroen Kontseiluak neurri sorta bat onartuko du Irango gerraren ondorio ekonomikoei aurre egiteko. Gobernuak astelehenera aurreratu du bilera, krisiaren aurkako neurri gehienen indarraldia ekainaren 30ean iraungiko delako.

Dekretuaren edukia oraindik zehaztu ez bada ere, Pedro Sanchez Espainiako Gobernuko presidenteak aurreratu du enpresa-sarea eta herritarrak gatazkaren eraginetik babesteko jarduerak barne hartuko dituela.

Errege lege-dekretu berriak martxoan onartutako neurrien zati bat ordeztuko du. Neurri horietako batzuk, elektrizitatearen gaineko BEZaren beherapena kasu, dagoeneko bertan behera geratu dira, energia-prezioak moteldu direlako. Ministroen Kontseiluan onartu eta Espainiako Aldizkari Ofizialean argitaratu ondoren, kongresuak baliozkotu beharko du testua, hogeita hamar eguneko epean.

2027ko aurrekontuak

Bestalde, astelehen honetako saioan, 2027ko Estatuko Aurrekontu Orokorren oinarri izango den koadro makroekonomikoa ere aurkeztuko da. Hurrengo urratsa Zerga eta Finantza Politikako Kontseilua deitzea izango da, autonomia-erkidegoei aurrekontu-egonkortasunaren helburuen eta administrazio publikoek beren gain hartu behar duten defizitaren banaketaren berri emateko.

Aurreikuspenen arabera, aurrekontuen proiektua uda igaro ondoren aurkeztuko da, eta Gobernuak BPGaren % 2,2ko hazkunde-aurreikuspenari eutsiko dio. 

Arlo fiskalean, Gobernuak murriztu egin du 2026ko itxierako defizitaren aurreikuspena, azaroan planteatutako % 2,1etik % 1,6ra. Bien bitartean, zor publikoaren ratioak % 100eko muga haustea eta urte amaierarako % 99,3an kokatzea espero du Exekutiboak.