Jaurlaritzaren funtzionarioek jaso egingo dute Gabonetako ordainsaria

Eusko Jaurlaritzaren 67.000 funtzionarioek jaso egingo dute Gabonetako aparteko ordainsaria, Idoia Mendia jarduneko Jaurlaritzako bozeramaileak baieztatu duenez. Jaurlaritzak 200 milioi euro bideratuko ditu zeregin horretarako.

Mendiaren esanetan, ordainsaria ez ematea "bidegabea" izango litzateke, eta, gainera, ez luke "ia eraginik" izango defizitean. Salbuespen gisa, Jaurlaritzako kideek ez dute ordainsaria jasoko.  Eusko Legebiltzarreko 108 langileek jaso egingo dute ordainsaria, baina parlamentariek eta taldeetako aholkulariek, aldiz, ez.

Aurrekontuen legea eta txosten juridikoa, oinarri

Mendiak azaldu duenez, Jaurlaritzak modu bakarra zuen ordainsariaren ordainketa bertan behera uzten zuen dekretua abian jartzeko: Euskadin indarrean zegoen Aurrekontuen Legea aldatzea. Baina, uztailean ez zen jardunik egon Legebiltzarrean (orduan onartu zuten dekretua), eta, ondoren, Legebiltzarra desegin zuten. ''Legebiltzarrean Aurrekontuen Legea moldatu gabe ordainsaria ez ordaintzea erabaki izan bagenu, Zuzenbidearekin bat ez datorren erabakia hartzen egongo ginateke'', azaldu du.

Halaber, Jaurlaritzak esku artean duen txosten juridiko baten arabera, Mariano Rajoyren Gobernuak gastu publikoa murrizteko onartutako dekretuak urratu egiten ditu EAEren eskuduntzak, eta, kasu horietan, arau autonomikoa lehenesten da. Txosten hori aztertzeko orduan, Patxi Lopezen Exekutiboan interpretazio ezberdinak izan dira, baina, azkenean, abenduko aparteko soldata ordaintzea erabaki dute.

Mendiak astelehen honetan ETB-2n azaldu zuenez, jarduneko Jaurlaritza ordainsaria ordaintzearen aldekoa da, baina, azken hitza eurek dutela jakinda ere, erabakia EAJrekin aztertu nahi zuten, joan den ostegunean egitekoa zen eta azkenean bertan behera geratu zen bileran.

Rajoyren Gobernuak neurriak aztertuko ditu

Jaurlaritzak hartutako erabakia geldiarazteko zein neurri juridiko zein politiko bidera daitezkeen aztertuko du Mariano Rajoyren Gobernuak, Gobernuak berak Euskadin duen ordezkaritzako iturriek jakitera eman dutenez. Hala, Estatuko abokatuek sakonean aztertuko dute egoera, Jaurlaritzaren erabakia bide judizialetik geldi daitekeen ala Auzitegi Konstituzionalaren epaiari itxaron behar dioten jakiteko.

Dirua itzuli beharraren arriskua

Mendiak azpimarratu du ''txosten juridikoak eta Konstituzionalaren jurisprudentzia'' oinarri hartuta hartu dutela erabakia, baina aitortu du azken hitza Konstituzionalaren esku egon daitekeela, eta dirua itzultzera behartu ditzakeela langileak. ''Hori hurrengo Gobernuari egokituko zaion erabakia izango da'', gaineratu du.

Ildo horretan, EAJk segurtasun juridikoa eskatu du, ordainsaria itzuli behar ez izateko. Eusko Jaurlaritzak ordainsariaren inguruan hartutako erabakiari ''ahalik eta segurtasun juridiko handiena'' ematea eskatu dute jeltzaleek, Justiziak langileak ''ordainsari hori itzultzera'' behartzeko arriskua egon ez dadin. Halaber, irtenbidea erakunde guztietan (udaletan, aldundietan edo Eusko Jaurlaritzan) berdina ez izatea gerta litekeela aurreratu dute, bakoitzak bere aplikazio esparrua duelako.

Arantza Quiroga PPk Eusko Legebiltzarrean duen ordezkariaren hitzetan, Jaurlaritzaren jarrerak ''segurtasun juridiko eza'' dakar.

Nafarroan erabakia airean dago oraindik

Nafarroan airean da oraindik Gabonetako ordainsariarekin zer gertatuko den. UPNren Gobernuak hurrengo urteko ekainekoa urtarrilera aurreratu nahi du, baina, oposizioak ez du begi onez ikusten langileek bidean ordainsarietako bat galtzea, eta Gabonetakoa ordaintzeko eskatu diote Yolanda Barcinari. Hala, hurrengo astean jarraituko du aparteko soldatarekin zer egin aztertzen ari den ponentzia berezia. Bien bitartean, Eusko Jaurlaritzari bere erabakia babesten duen txosten juridikoa eskatu diote, balekoa den aztertzeko.

Foru Aldundietan

Bizkaiko eta Arabako aldundiek dagoeneko iragarri dute ez dutelaGabonetan ordainsaria ordainduko. Gipuzkoak ordaindu nahi du, baina,oraingoz, ez du formula aurkitu.