Euskadi % 3,6 haziko da aurten, eta % 2,7, datorren urtean, Laboral Kutxaren arabera

Laboral Kutxak jaitsi egin ditu Euskadirako aurreikuspen ekonomikoak, eta, gaur aurkeztu duen ekonomiari buruzko txostenean esan duenez, Euskadi % 3,6 haziko litzateke aurten, eta % 2,7, hurrengo urtean.

Joseba Madariaga Laboral Kutxako Ikerketa Saileko zuzendariaren esanetan, "zaila" da Euskadi edo Espainia atzeraldian sartzea, beti ere, "estres egoeran" sartu ezean, baina egoera hori, gaur gaurkoz, ez da aurreikusten.

Madariagaren iritziz, prezioek gora egiten jarraituko dute aurten, baina baliteke urte bukaeran "tasa lasaitzen hastea". Atzeraldian sartzeko, gaineratu duenaren arabera, zenbait gauza gertatu beharko lirateke. Horren ildotik esan du "Europako ekonomiarentzat kolpe handia" litzatekela Errusiak gasaren hornikuntza etetea; horrek "atzeraldia" eragin lezakela. 

Ikerketaren egileak adierazi duenez, "ziurgabetasun handia dago", eta, hori dela eta, zifrak "aldakortasun handia izan dezaketen estimazioak dira". Madariagaren iritzian, EAEko BPGa % 3,6 haziko da 2022an, eta % 2,7, 2023an. Gainera, Euskadin, enplegua % 1 haziko dela uste du, eta % 0,7, datorren urtean.

Edonola ere, Madariagak azpimarratu du oraintxe "hazkundean" gaudela, nahiz eta "dezelerazioa" egon den. Halaber, "testuingurua goibel egon arren", Next Generation Funtsek "ekonomian ekarri beharko luketen bultzada eraldatzailea" baliogarritzat jo du, "aukera paregabea eskaintzen dutelako herrialdearen egitura ekonomikoa modernizatzeko ekoizpen sarea sortzeko".